اومان:سنگ مرمر کی کان میں حادثہ،سات پاکستانی جاں بحق، چار لاپتہ

اومان کے شہر IBRI میں سنگ مرمر کی ایک کان کے افسوسناک حادثے میں سات پاکستانی جاں بحق اور چار لاپتہ ہوگئے ہیں۔ تفصیلات کے مطابق یہ حادثہ اس وقت پیش آیا جب ایک تودہ سنگ مرمر کی کان پر آگرا۔ ایک پاکستانی زخمی ہے جس کا علاج معالجہ جاری ہے۔اومان میں پاکستان سفارتخانہ تلاش اور امدادی کارروائی میں اومانی حکام سے قریبی رابطے میں ہے۔ سفارتخانے کے دو افسران نے IBRI کا دور ہ کیا اور سوگوار خاندانوں اور کارکنوں سے ملاقات کی۔سفارتخانے نے بھرپور تعاون کرتے ہوئے یقین دلایا کہ میتوں کی ملک منتقلی کیلئے ضابطے کی کارروائی جلد مکمل کی جائے گی۔ اومانی حکام نے تلاش اور بچاو کی کارروائی کیلئے بھاری مشینری، جدید کیمرے اور سراغ رساں کتے تعینات کردئیے ہیں۔