سوئچ بورڈ ٹھیک کرتے ٹرانسفارمر اڑ گیا‘ میپکو سمیت متعدد دفاتر بجلی سے محروم

ملتان (سٹاف رپورٹر) میپکو ہیڈکوارٹر ،ملتان سرکل ،کمرشل ڈائریکٹوریٹ سمیت خانیوال روڈ پر واقع دفاترڈیڑھ گھنٹے تک بجلی سے محروم رہے۔ میپکوملتان سرکل کے سوئچ بورڈ میں پیدا ہونے والی خرابی کو دور کرنے کے دوران ٹرانسفارمر میں دھماکہ ہونے سے بجلی غائب ہوئی۔ وحدت کالونی فیڈر کا جمپرنکل جانے سے تمام میپکو دفاتر بجلی سے محروم ہوگئے۔ روزہ دار افسروں اورملازمین کا شدید گرمی سے برا حال ہوگیا۔ اڑھائی بجے تک بجلی بحال نہ ہونے پر افسروں اور ملازمین نے دفاتر چھوڑدئیے۔ دفتری اوقات کے خاتمے کے بعدبھی سرکاری امور انجام دینے والے افسروں اور ملازمین کا بجلی کے بغیرشدید گرمی میں دفاتر میں بیٹھنا محال ہوگیا۔ منگل کے روز ہونے والی بجلی بندش کی تحقیقات کا حکم دے دیا گیا ہے۔