لاہور(کلچرل رپورٹر)گورنمنٹ کالج یونیورسٹی کے طلبہ وطالبات کے 25رکنی وفد نے الحمراء  آرٹ میوزیم کا دورہ کیا۔میوزیم کے سٹاف نے وفد کو میوزیم میں آویزاں فن پارے دکھائے اور انہیں بریف کیا۔وفد نے اپنے دورہ الحمراء  آرٹ میوزیم کو ثمر آور قرار دیا۔ ایگزیکٹو ڈائریکٹر لاہورآرٹس کونسل محمد سلیم ساگر نے کہا کہ الحمراء آرٹ میوزیم فنو ن لطیفہ کی ترویج و ترقی کا ضامن ہے۔ الحمرا کلچرل کمپلیکس (قذافی سٹیڈیم)میں آرٹ میوزیم نئی نسل کے آرٹسٹوں کیلئے نئی سوچ،نئے ولوے کا موجب ہے، ہمارا مصور بے پناہ صلاحیتوں کا مالک ہے،فن پارے اعلی ٰ انسانی اقدار کو معاشرے میں پنپنے کا موقع فراہم کر رہے ہیں۔انہوں نے کہا الحمراء آرٹ میوزیم کے فن پاروں سے ہزار ہاسالہ تہذیب وثقافت جھلکتی ہے۔عالمی شہرہ آفاق آرٹسٹوں عبدالرحمن چغتائی،استاد اللہ بخش، صادقین، شاکرعلی،ایس صفدر، حنیف رامے، شمزا، احمد  پرویز،کولن ڈیوڈاوراسلم کمال کے فن پارے میوزیم کی زینت ہیں۔ میر ی کترینا، کامل خان، ممتاز، انا مولیکا احمد،سعید اختر، زبیدہ آغا،خالد اقبال جیسے مستند مصور کاکام بھی اس میوزیم کا اثاثہ ہیں۔فنون لطیفہ سے محبت رکھنے والوں کے پیش نظر الحمراء  آرٹ میوزیم کا ورچوئل ٹور الحمرا کی ویب سائٹ پر موجود ہیں۔