شاہد حمید بھٹہ
ملک کے دیگر حصوں کی طرح ملتان میں بھی یوم تکبیر کی سلور جوبلی کی تقریبات کا انعقاد کیا گیا جس میں شہریوں نے بڑھ چڑھ کر حصہ لیا اس موقع پر شرکاء کا کہنا تھا کہ 28 مئی پاکستان نے ایٹمی دھماکہ کر کے ملک دشمن قوتوں کو یہ پیغام دیا تھا کہ ہم کسی سے کم نہیں بلکہ اینٹ کا جواب پتھر سے دیا جائے گا۔یوم تکبیر کی تقریب میں سابق ڈپٹی میئر منور احسان قریشی سابق چیئرمین زاہد قریشی ،عباس احمد خان، رانا عارف عثمان عارف و دیگر شریک تھے۔انجمن تاجران جنرل بس اسٹینڈ کے زیر اہتمام بھی 28 مئی یوم تکبیر کے حوالے سے تقریب منعقد کی گئی جس میں چیئرمین رانا اصغر شیخ ،راشد شیخ ،خرم شہزاد، سعد رحمانی ،نزاکت حسین بھٹی، اسلم شاہد ،رانا اسامہ ودیگر ودیگر تاجروں نے کیک کاٹا اس موقع پر رانا اصغر نے کہا یوم تکبیر تجدید وطن کی سے محبت اور تجدید سلامتی کا دن ہے ہمیں پاکستان کے ایٹمی اسلامی طاقت ہونے پر فخر ہے۔یوم تکبیر کے حوالے سے وہاڑی میں بھی مرکزی مسلم لیگ کے زیر اہتمام ریلی نکالی گئی ریلی کی قیادت محمد عثمان حیدر، عبدالرحمن، محمد شاہد غلام مرتضی عبدالعزیز ریاض حبیب الرحمن کر رہے تھے ریلی وی چوک سے شروع ہوئی جو مختلف راستوں سے ہوتی ہوئی اپنی منزل پر پہنچ کر اختتام پذیر ہوئی۔کارکنان نے پاک فوج زندہ باد کے نعرے لگا ئے اس موقع پر محمد عثمان نے ریلی کے شرکاء  سے خطاب کرتے ہوئے کہا کہ ہمیں اپنے ایٹمی ملک ہونے پر فخر ہے اور یہی وجہ ہے کہ ہمارا دشمن ملک ہماری طرف میلی آنکھ سے دیکھنے سے بھی ڈرتا ہے۔ افواج پاکستان کی ملک و قوم کے لئے دی جانے والی قربانیاں قابل تحسین ہیں اور پورے ملک کے عوام پاک فوج کے ساتھ کھڑے ہیں۔یوم تکبیر کے سلسلہ میں پاکستان مسلم لیگ ن لائرز فورم ملتان ڈویژن کے زیراہتمام تقریب منعقد ہوئی اس موقع پر جنرل سیکرٹری عابد حسین بھٹہ نائب صدر رانا مقصود افضل ،ملک محمد عمر کمبوہ ،میاں عمران بھٹہ دیگر نے کیک کاٹا تقریب سے خطاب کرتے ہوئے عابد جسین بھٹہ نے کہا کہ یوم تکبیر میاں نواز شریف کی جراء ت استقامت کا دن ہے جب خطہ میں طاقت کا توازن بھارت نے خراب کیا تو انہوں نے امریکہ سمیت عالمی طاقتوں کے دبا کو مسترد کرتے ہوئے ایٹمی دھماکے کئے اور جرأت کا مظاہرہ کرکے پاکستانی قوم کا سر فخر سے بلند کردیا آج انہیں جلاوطن کرکے قوم سے دور کردیا انہوں نے کہا کہ آج پھر پاکستان کو میاں نواز شریف جیسی نڈر جرات مند قیادت کی ضرورت ہے تاکہ ملک بحرانوں سے نجات حاصل کرے اور بہتری کی جانب سفر کرے تقریب میں نوید کوریجہ ،اظہر سعید ،رانا نزیر سعید ،محمد لودھی دیگر نے شرکت کی۔مسلم لیگ ن شعبہ خواتین سٹی کے زیر اہتمام نواب پور روڈ پل مونڈھے والی پر یوم تکبیر کے حوالے سے کیک کاٹنے کی تقریب منعقد کی گئی جس میں شعبہ خواتین کی سٹی صدر وسابق رکن صوبائی اسمبلی سلطانہ شاہین ،جنرل سیکرٹری وسابق رکن قومی اسمبلی شاہین شفیق  مہمان خصوصی تھیں اس موقع پر شرکاء نے قائد میاں نواز شریف اور پاک فوج زندہ آ باد کے نعرے لگائے جبکہ یوم تکبیر کے سلسلے میں کیک کاٹا گیا اور اس موقع پر خواتین رہنماؤں افشین بٹ،فہمیدہ چوہان ،سہیلہ اقبال ودیگر نے شرکت کی۔ تقریب سے سلطانہ شاہین ،شاہین شفیق نے خطاب کرتے ہوئے کہا کہ قائد میاں نواز شریف نے 28 مئی کو ایٹمی دھماکے کرکے بھارت کو منہ توڑ جواب دیا پاک فوج دنیا کی بہادر افواج ہے جو ملک وقوم  کے دفاع میں دشمن قوتوں کو منہ توڑ جواب دے سکتی ہے میاں نواز شریف جلد وطن واپس آ ئیں گے اور ملک بھر سے عوام ان کا شاندار استقبال کریں گے۔