کراچی:موٹرسائیکل سواروں کی کارپرفائرنگ ،2سگے بھائی جاں بحق ،2زخمی

کراچی کے علاقے جمشید کوارٹر میں صبح سویرے موٹرسائیکل سواروں نے کارپرفائرنگ کردی جس کے نتیجے میں 2 سگے بھائی جاں بحق اور2زخمی ہو گئے جبکہ ایک محفوظ رہا ۔ پولیس کے مطابق واقعہ پرانی دشمنی کا نتیجہ ہے۔ایس پی جمشید کوارٹر علینہ راجپر کے مطابق موٹر سائیکلوں پر سوار ملزمان نے گرو مندر چوک کے قریب سیاہ رنگ کی کار کو فائرنگ سے نشانہ بنایا، ملزمان نے 2 طرف سے کار پر اندھا دھند فائرنگ کی جس کے نتیجے میں کار میں سوار 2 بھائی واجد اورنگزیب اور شان اورنگزیب شدید زخمی ہوئے، جنہیں فوری طور پر ہسپتا ل منتقل کیا گیا تاہم وہاں پہنچنے تک دونوں بھائیوں کی موت واقع ہو چکی تھی۔ایس پی جمشید کوارٹرز علینہ راجپر نے بتایاکہ کار میں 5 بھائی سوار تھے، جن میں سے 2 جاں بحق اور 2 شدید زخمی ہوئے ، دونوں زخمیوں کو نجی ہسپتا ل منتقل کر دیا گیا ، جہاں ایک کی حالت تشویش ناک ہے جبکہ پانچواں بھائی حملے میں بال بال بچ گیا ، جائے وقوع سے نائن ایم پستول کے 18 خول برآمد ہوئے ہیں جبکہ کار پر بھی لگ بھگ اتنی ہی گولیوں کے نشانات پائے گئے ہیں۔پولیس کے مطابق کار پر فائرنگ مبینہ طور پر دشمنی کی بنا پر کی گئی، جاں بحق ہونے والے ایک معروف آئسکریم شاپ سے تعلق رکھتے ہیں۔پولیس کے مطابق پانچوں بھائیوں کو پیشی پر سٹی کورٹ جاتے ہوئے نشانہ بنایا گیا ۔سینئر سپرنٹنڈنٹ پولیس ایسٹ فرخ رضا نے بتایا ہے کہ مقتولین کی ایک دوسرے فریق سے ایک قتل کی واردات کے بعد سے دشمنی چلی آ رہی ہے۔مقتولین کا بھائی مبینہ طور پر دوسرے فریق کے قتل میں ملوث ہے تاہم پولیس مزید تحقیقات کر رہی ہے۔