محکمہ ایکسائز کا چالو بھٹی پر چھاپہ، 2 ملزم گرفتار

لاہور (نامہ نگار) محکمہ ایکسائز کی ٹیم نے شہر میں منشیات فروشوں کے خلاف کریک ڈاﺅن کرتے ہوئے 2 منشیات فروشوں کو گرفتار کرکے چالو شراب کی بھٹی پکڑ لی اور بڑی مقدار میں شراب اور ہیروئن برآمد کرلی ہے۔ تفصیلات کے مطابق ای ٹی او ایکسائز خالد باجوہ کے احکامات پر ای ٹی او نصیر الدین کی سربراہی میں انسپکٹر شیخ شہزاد اور قمر شاہ وغیرہ پر مشتمل ٹیم نے نواں کوٹ کے علاقہ میں امانت مسیح کے گھر چھاپہ مار کر چالو شراب کی بھٹی پکڑ لی، ایکسائز ٹیم نے ملزم امانت مسیح کو گرفتار کرکے 30 لٹر شراب اور شراب کی تیاری کا سامان قبضہ میں لے لیا ہے۔ اسی ٹیم نے گوالمنڈی کے علاقہ میں چھاپہ مار کر منشیات فروش اشفاق عرف چودھری کو گرفتار کرکے سوا کلو ہیروئن برآمد کرلی۔