نادرا نے ڈیجیٹل سفر میں کئی ملکوں کی مدد کی ہے: چیئرمین

پیرس (نوائے وقت رپورٹ) فرانس دارالحکومت پیرس میں 3 روزہ نمائش ’’ٹرسٹیک‘‘ کے نام سے شروع ہو گئی ہے۔ نمائش میں پاکستان کی نمائندگی چیئرمین نادرا لیفٹیننٹ جنرل منیر افسر کر رہے ہیں۔ چیئرمین نادرا نے نمائش کے شرکاء سے گفتگو کرتے ہوئے 2000ء میں ’’نادرا‘‘ کے قیام اور اس کے اغراض و مقاصد پر روشنی ڈالی۔ انہوں نے بتایا کہ ’’نادرا‘‘ نے ڈیٹا کے ڈیجیٹل کئے جانے کے سفر میں کئی ملکوں کی مدد کی ہے۔ انہوں نے بتایا کہ نادرا سے استفادہ کرنے والے ملکوں نے ٹیکنالوجی کی مکمل منتقلی کے ساتھ ساتھ مرضی کے حل حاصل کئے جس  نے سیکھنے اور اعتماد کے باہمی عمل کو فروغ دیا ہے۔ مزید برآں فرانس میں پاکستان کے سفیر عاصم افتخار احمد نے نمائش میں نادرا کے پویلین کا دورہ کیا جس پر چیئرمین نادرا نے انہیں مختلف معاملات پر بریفنگ دی۔