چیئرمین جوائنٹ آف چیفس کمیٹی جنرل ساحر شمشاد کا دورہ نیول بیس اورماڑہ 

اسلام آباد (خبرنگار خصوصی) چیئرمین جوائنٹ چیفس آف سٹاف کمیٹی جنرل ساحر شمشاد مرزا نے نیول آپریشنل بیس اورماڑہ کا دورہ کیا۔ پاک فوج کے شعبہ تعلقات عامہ کے مطابق جنرل ساحر شمشاد مرزا کو لاحق خطرات اور صورتحال پر بریفنگ دی گئی۔ جنرل ساحر شمشاد نے بحری جہازوں اور آبدوزوں کا بھی معائنہ کیا اور جنگی تیاریوں کا جائزہ لیا۔ آئی ایس پی آر کے مطابق جنرل ساحر شمشاد نے ساحلی ایریا اور جہاز پر سوار جوانوں سے بھی ملاقات کی۔ انہوں نے تعینات جوانوں اور بحری اثاثوں کی آپریشنل صلاحیتوں کو سراہا۔ آئی ایس پی آر کے مطابق اپنے دورہ کے دوران چیئرمین جوائنٹ چیفس آف سٹاف کمیٹی جنرل ساحر شمشاد نے جوانوں کے جذبہ کی بھی تعریف کی۔