کراچی(اسپورٹس رپورٹر)  نیدرلینڈز کرکٹ ٹیم کے کوچ ریان کک نے کہا ہے کہ پاکستان کے خلاف حال ہی میں بہت اچھے میچز ہوئے ہیں جس سے ٹیم کو اعتماد ملا ہے، ٹیم ون ڈے سیریز میں بہت قریب آئی تھی، امید ہے اس بار لائن کراس کرلے گی۔پرتھ میں پریس کانفرنس کرتے ہوئے ریان کک نے کہا کہ زمبابوے کیخلاف میچ میں پاکستان کی شکست کے بعد یہ تو اندازہ ہوگیا کہ پاکستان ناقابل تسخیر ٹیم نہیں، اسکو ہرایا جاسکتا ہے۔ ریان کک نے اعتماد ظاہر کیا کہ ان کی ٹیم پاکستان کو قابو کرسکتی ہیَ ہر ٹیم میچ جیتنے کی کوشش کرتی ہے، نیدرلینڈز کی بھی یہ ہی کوشش ہوگی، کچھ عرصہ قبل ہی پاکستان کیخلاف ون ڈے میچز کھیلے تھے جس میں بہت اچھا مقابلہ کیا جس سے ٹیم کو کافی اعتماد ملا ہے، امید ہے اس بار نتائج پہلے سے بہتر ہوں گے۔ نیدرلینڈز کا بائولنگ اٹیک اچھی فارم میں ہے اور امید ہے کہ وہ پاکستان کو محدود کرنے میں اہم کردار ادا کریگا۔ کوشش ہوگی کہ پاکستان کیخلاف جلد وکٹیں لیں اور اس کی بیٹنگ کو پریشان کیا جائے۔ اگست میں ہونیوالی پاکستان اور نیدرلینڈز کی سیریز نے ان کی ٹیم کو پاکستان کی سٹرینتھ اور اس کے مقابلے میں اپنی قوت کو جانچنے کا موقع دیا تھا، اس لیے ٹیم کو اندازہ ہے کہ اسے کس چیلنج کا سامنا کرنا پڑیگا اور وہ اس چیلنج کیلئے تیار ہے۔ پاکستان کا بائولنگ اٹیک اچھا ہے اور اس سے نبردآزما ہونے کیلئے نیدرلینڈز کے بیٹرز نے انفرادی اور مجموعی پلاننگ کی ہے، امید ہے میچ میں اس پلان پر کامیابی سے عمل درآمد ہوگا۔ اہم بات یہ ہے کہ نیدرلینڈز اپنے پلان کے مطابق کھیلے اور اچھے نتائج کیلئے ایفرٹ کرے۔