صدر کی پاک فوج کے شہداءکے لواحقین سے ٹیلی فون پر تعزیت

 اسلام آباد (خبرنگارخصوصی) صدر مملکت ڈاکٹر عارف علوی نے پاک فوج کے شہداءکے لواحقین سے ٹیلی فون پر اظہارِ تعزیت کیا ہے۔ ایوان صدر میڈیا ونگ کی جانب سے اتوار کو جاری پریس ریلیز کے مطابق صدر مملکت نے 16 اور 18 اکتوبر کو شمالی اور جنوبی وزیرستان میں شہید ہونے والے پاک فوج کے جوانوں کے اہل خانہ سے فون پر گفتگو کرتے ہوئے سپاہی عبد الحمید ، لانس نائیک تبسم الحق اور سپاہی نعیم اختر کو خراج عقیدت پیش کیا۔ انہوں نے لانس نائیک وارث خان اور سپاہی ساجد عظیم کے ورثاء کے ساتھ بھی ٹیلی فونک گفتگو میں خراج عقیدت پیش کیا۔صدر مملکت نے شہداء کی وطن کیلئے خدمات ، جان کا نذرانہ پیش کرنے پر قوم کی جانب سے سلام پیش کیا۔ انہوں نے اہل خانہ کے ساتھ اظہار ہمدردی اور شہداء کے اہل خانہ کیلئے صبر جمیل کی دعا بھی کی۔