مانسہرہ ؍ کوئٹہ (نوائے وقت رپورٹ+ آئی این پی) مانسہرہ میں مسافر بس الٹنے سے 5 افراد جاں بحق اور 18 افراد زخمی ہوگئے۔ ریسکیو حکام کے مطابق مانسہرہ میں کلگان موڑ کے مقام پر  حادثے کا شکار بس گلگت سے راولپنڈی آ رہی تھی۔ حکام کے مطابق مسافر بس کو حادثہ تیز رفتاری کے باعث پیش آیا۔ زخمی مسافروں میں خواتین اور بچے بھی شامل ہیں۔ جاں بحق مسافروں میں عبداللہ، شفقت اللہ، بخت اللہ، فاروق شامل ہیں۔ بلوچستان میں دو ٹریفک حادثات میں چھ افراد  جاں بحق ہو گئے۔ لیویز حکام کے مطابق واشک میں دو گاڑیوں میں تصادم ہو گیا۔ چار افراد جھلس کر جاں بحق ہو گئے۔ دو تیل بردار ٹینکروں میں تصادم کے باعث آگ بھڑک اٹھی۔ دالبندین کے قریب باراتیوں کی بس الٹ گئی۔ دو جاں بحق، پانچ زخمی ہو گئے۔ زخمیوں کو طبی امداد کیلئے ہسپتال منتقل کر دیا گیا۔