لاہور(سپورٹس رپورٹر) اگلے سال آسٹریلیا میں منعقد ہونے والے کامن ویلتھ گیمز کی کوئینز بیٹن ریلے دنیا کے مختلف ممالک کا سفر مکمل کرنے کے بعد جمعہ کو رات گئے پاکستان پہنچ گئی۔ علامہ اقبال ائر پورٹ پر پاکستان اولمپک ایسوسی ایشن کے صدر لیفٹیننٹ جنرل (ر) سید عارف حسن نے کوئینز بیٹن ریلے کے ساتھ آنے والے چار رکنی آسٹریلوی وفد کا استقبال کیا۔ بعد ازاں وفد کو سخت سیکورٹی میں ائر پورٹ سے ہوٹل تک پہنچایا گیا۔ پاکستان اولمپک ایسوسی ایشن کے زیر اہتمام کوئینز بیٹن ریلے کے حوالے سے خصوصی تقریب 2 اکتوبر کو حضوری باغ شاہی قلعہ میں ہوگی جس کے مہمان خصوصی وزیر اعلٰی پنجاب جبکہ سہ پہر تین بجے ڈی ایچ اے سٹی سکول میں تقریب ہوگی جس کے مہمان خصوصی گورنر پنجاب ہونگے۔ اس موقع پر کامن ویلتھ گیمز اور اولمپک گیمز میں شرکت اور میڈل حاصل کرنے والے کھلاڑیوں کو خصوصی طور پر شرکت کے دعوت نامے جاری کیے گئے ہیں۔