کلب کرکٹ اصل نرسری، کامیابی کیلئے کوئی شارٹ کٹ نہیں: شعیب ملک

لاہور (نمائندہ سپورٹس +سپورٹس رپورٹر)آل راونڈر شعیب ملک کا کہنا ہے کہ ڈائمنڈ کرکٹ کلب سے ہونہار کرکٹر سامنے آ رہے ہیں یہاں کھیل کی بہترین سہولیات ہیں اور نوجوان کرکٹرز کو صلاحیتوں کے اظہار کا بہترین موقع ملتا ہے۔ کلب کرکٹ ہی اصل نرسری ہے اس سطح پر اچھا کام ہو تو گراس روٹ لیول سے ہی تیار کرکٹرز سامنے آتے ہیں۔ شعیب ملک نے ان خیالات کا اظہار ڈائمنڈ کرکٹ کلب کے دورے کے موقع پر کیا۔ انہوں نے نوجوان کرکٹرز کو اپنے تجربات بتائے۔ کرکٹرز کو مسلسل محنت کی ہدایت کی۔ شعیب ملک نے کہا کہ کامیاب کرکٹر بننے کے لیے کوئی شارٹ کٹ نہیں ہے۔ مسلسل جدوجہد سے ہی اچھے کرکٹر بنتے ہیں۔ انہوں نے نوجوان کرکٹرز کے ساتھ ملاقات کا اہتمام کرنے اور کلب کے دورے کی دعوت دینے پر ڈائمنڈ کرکٹ کلب کے میڈیا مینجر عتیق شیخ اور کلب انتظامیہ کا شکریہ ادا کیا۔