کسی کو خطے کی صورتحال کا فائدہ نہیں اٹھانے دیں گے : جنرل ندیم 

 اسلام آباد (خصوصی نامہ نگار) چیئرمین جوائنٹ چیفس آف سٹاف کمیٹی جنرل ندیم رضا نے کہا  ہے کہ پاکستان پر امن بقائے باہمی کے اصول پر کار بند ہے، ہر طرح کے خطرات سے نمٹنے کی صلاحیت رکھتے ہیں، امن کی خواہش کو کمزوری نہ سمجھا جائے۔ کسی کو خطے کی غیرمستحکم صورتحال کا ناجائز فائدہ نہیں اٹھانے دیں گے۔  افواج روایتی اور غیر روایتی ہر طرح کے خطرات سے نمٹنے کی بھرپور صلاحیت رکھتی ہیں۔ کشمیریوں کی سیاسی، سفارتی اور اخلاقی حمایت جاری رکھیں گے ۔ وہ پاکستان ائیر فورس اصغر خان اکیڈمی رسالپور میں146ویں گریجویشن تقریب سے  بطور مہمان خصوصی خطاب کر رہے تھے۔ ترجمان پاک فضائیہ کے مطابق پاکستان ائیر فورس اصغر خان اکیڈمی رسالپور میں 146ویں جی ڈی (پی)، 92ویں انجینئرنگ، 102ویں ایئر ڈیفنس، 92 اور 94ویں رائل سعودی ایئر فورس انجینئرنگ کیڈٹس کے کورسز کی گریجویشن تقریب منعقد ہوئی۔ اکیڈمی پہنچنے پر ایئر وائس مارشل محمد قیصر جنجوعہ، ایئر آفیسر کمانڈنگ پی اے ایف اکیڈمی اصغر خان نے مہمان خصوصی کا استقبال کیا۔ جنرل ندیم رضا نے پریڈ کامعائنہ کیا۔ ترجمان پاک فضائیہ کے مطابق پاسنگ آؤٹ پریڈ کی تقریب میں کل 115 ایوی ایشن کیڈٹس، 10 جنٹلمین کیڈٹس اور 22 رائل سعودی ایئر فورس کیڈٹس گریجویٹ ہوئے۔ مہمان خصوصی نے فارغ التحصیل ہونے والے کیڈٹس کو برانچ انسگنیا اور نمایاں کارکردگی دکھانے والے گریجوایٹس کو ٹرافیوں سے نوازا گیا۔ جنرل سروس ٹریننگ میں بہترین کارکردگی پر چیئرمین جوائنٹ چیفس آف سٹاف کمیٹی کی ٹرافی ایوی ایشن کیڈٹ اکیڈمی انڈر آفیسر صبیح الدین نے اپنے نام کی جبکہ انجینئرنگ ڈسپلن میں بہترین کارکردگی پر چیف آف دی ائیر سٹاف ٹرافی ایوی ایشن کیڈٹ سکواڈرن انڈر آفیسر محمد ثاقب شیر کو دی گئی۔ فلائنگ ٹریننگ میں شاندار کارکردگی پر چیف آف دی ائیر سٹاف بہترین پائلٹ ٹرافی ایوی ایشن کیڈٹ احسن علی خٹک نے اپنے نام کی۔ 92ویں رائل سعودی ائیر فورس کیڈٹس کورس کی بہترین الائیڈ کیڈٹ ٹرافی رائل سعودی ائیر فورس کے کیڈٹ فہد مبارک الجوہانی نے جیتی جبکہ 94ویں رائل سعودی ائیر فورس کیڈٹس کورس کی بہترین الائیڈ کیڈٹ ٹرافی رائل سعودی ائیر فورس کے کیڈٹ ولید خالد عبداللہ الترکی کو دی گئی۔ کالج آف ایروناٹیکل انجینئرنگ میں مجموعی طور پر بہترین کارکردگی کی اعزازی تلوار ایوی ایشن کیڈٹ سکواڈرن انڈر آفیسر محمد ثاقب شیر نے حاصل کی جبکہ کالج آف فلائنگ ٹریننگ میں مجموعی طور پر بہترین کارکردگی پر ایوی ایشن کیڈٹ محمد سعد بنگش کو اعزازی تلوار سے نوازا گیا۔ تقریب کے بعد پی اے ایف اکیڈمی ایروبیٹکس ٹیم ‘‘شیردلز’’ کی طرف سے ایک سنسنی خیز ہوائی ڈسپلے پیش کیا گیا جس نے اعلیٰ معیار کی فارمیشن ایروبیٹکس اور فلائنگ ڈسپلے کے ذریعے شائقین کے دل موہ لئے۔