لبنان کے دارالحکومت بیروت کے شہری علاقوں پر اسرائیلی بمباری کے نتیجے میں مزید 108 شہری شہید اور درجنوں زخمی ہو گئے۔غیر ملکی خبر رساں ادارے کے مطابق اسرائیلی طیاروں نے وادی بقاع اور عین الدلب سمیت لبنان کے دیگر علاقوں کو نشانہ بنایا ، اسرائیلی فوج نے حزب اللّٰہ کے 120 مقامات کو نشانہ بنانے کا دعویٰ کیا ہے۔عرب میڈیا کی رپورٹ کے مطابق اسرائیلی فوج کی جانب سے بھاری جنگی ہتھیاروں اور گاڑیوں کے ہمراہ لبنان کی سرحد کی طرف پیش قدمی جاری ہے جس سے لبنان پر زمینی حملے کے خدشات گہرے ہوتے جا رہے ہیں۔لبنان میں اسرائیلی حملوں کے باعث غذائی بحران شدت اختیار کر گیا، 20 لاکھ سے زائد افراد محفوظ مقامات کی طرف نقل مکانی کر چکے ہیں۔
دوسری جانب اسرائیلی فوج نے یمن کے ساحلی شہر الحدیدہ پر بھی بڑا فضائی حملہ کیا . جس میں 4 یمنی شہید اور 29 زخمی ہو گئے۔ادھر اسرائیل کے غزہ کے اسکول سمیت مختلف مقامات پر حملوں میں مزید 28 فلسطینی شہید ہو گئے۔ صیہونی فوج نے مغربی کنارے میں دہشتگردانہ کارروائی میں 17 فلسطینی جوانوں کو بھی گرفتار کر لیا۔