”میں یہ نہیں کہہ سکتی ورنہ آپ صادق اور امین نہیں رہیں گے“

اسلام آباد(نمائندہ نوائے وقت)سپریم کورٹ میں ایک'' انتخابی مقدمہ '' کی سماعت کے دوران جسٹس دوست محمد خان نے ''صادق اورامین ''کے الفاظ کے زبان زد عام ہونے سے متعلق ایک دلچسپ گھریلو واقع سنا کر کمرہ عدالت کو زعفران زار بنا دیا ،جسٹس دوست محمد خان کی سربراہی میں جسٹس فائزعیسیٰ اورجسٹس سردارطارق مسعود پرمشتمل 3 رکنی بینچ نے بدھ کے روز محبوب علی ثانی بنام الیکشن کمیشن آف پاکستان کیس کی سماعت کے دوران جسٹس دوست محمد خان نے بتایا کہ میرا یک دوست مجھے اکثر گھر کے لینڈ لائن نمبر پر فون کرکے صحت کے مسائل کے حوالے سے لمبے لمبے لیکچر دیتا ہے ، اور میری چھوٹی پوتی اس سے تنگ ہوتی ہے ،کچھ روز قبل اس کا فون آیا تو پوتی نے مجھے بتایا کہ آپ کے دوست کا فون آیا ہے ،جس پر میں نے بچی کو خوش کرنے کے لئے کہا کہ کہہ دو کہ دادا گھر پر نہیں ہیں، تو اس نے کہا کہ نہیں میں یہ نہیں کہہ سکتی ورنہ آپ صادق اور امین نہیں رہیں گے ، جس پر کمرہ عدالت میں قہقہے گونج اٹھے۔