ورلڈ ٹیم سکواش چیمپئن شپ، پاکستان نے 5 کھلاڑیوں کو شارٹ لسٹ کر لیا

لاہور (سپورٹس رپورٹر+نمائندہ سپورٹس) پاکستان سکواش فیڈریشن نے ورلڈ مینز ٹیم سکواش چیمپئن شپ کیلئے 5 کھلاڑیوں کو شارٹ لسٹ کر دیا۔ پاکستان سکواش فیڈریشن کے نائب صدر قمر زمان کے مطابق قومی ٹیم کے انتخاب کیلئے ٹرائلز اختتام پذیر ہوگئے‘ملک بھر کے ٹاپ 10 کھلاڑیوں نے حصہ لیا ۔جن کھلاڑیوں کو ایونٹ کیلئے شارٹ لسٹ کیا گیا ہے ان میں فرحان زمان، اسرار احمد، عماد فرید، شاہجہان اور عاصم شامل ہیں۔ کھلاڑیوں کے ٹرائلز پاکستان سکواش فیڈریشن کے سیکرٹری گروپ کیپٹن طاہر اور قمر زمان نے لئے۔انہوں نے کہا کہ ایونٹ کی تیاری کیلئے قومی کھلاڑیوں کا تربیتی کیمپ لگایا جائے گا۔ انہوں نے کہا کہ6 قومی کھلاڑی آئندہ ماہ کے پہلے ہفتے میں تین مختلف مقابلوں میں پاکستان کی نمائندگی کریں گے۔ انہوں نے کہا کہ قومی کھلاڑی فرخان محبوب، فرخان زمان، اسرار احمد، عاصم، عماد فرید اور شاہجہان ستمبر کے پہلے ہفتے میں ہانگ کانگ، آسٹریلیا اور یورپ میں تین مختلف عالمی سکواش مقابلوں میں شرکت کیلئے جائیں گے۔ ان مقابلوں میں شرکت سے ان کے کھیل میں مزید بہتری اور نکھار آئے گا۔