سینٹرفار انٹرنیشنل اسٹریٹیجک اسٹڈیز سندھ کے وفد کادورہ جامعہ اردو

کراچی (نیوز رپورٹر) سینٹرفار انٹرنیشنل اسٹریٹیجک اسٹڈیز کے وفد نے وفاقی اردو یونیورسٹی کے شعبہ بین الاقوامی تعلقات کا دورہ کیا۔ وفد کی قیادت مذکورہ ادارے کی ایسوسی ایٹ ڈائریکٹر ریسرچ ڈاکٹر صبا سحر کررہی تھیں۔ ملاقات کے دوران سینٹر فار انٹرنیشنل اسٹریٹیجک اسٹڈیز اور شعبہ بین الاقوامی تعلقات کے مابین مفاہمت کی یادداشت( MOU ) پر دستخط ، مختلف مشترکہ منصوبوں، طلبہ کی انٹرن شپس، سیمینارز اور دیگر پروگراموں کے حوالے سے تفصیلی تبادلہ خیال کیا گیا۔ صدر شعبہ بین الاقوامی تعلقات ڈاکٹر اصغر دشتی اور ڈاکٹر فیصل جاوید نے وفد کو شعبہ بین الاقوامی تعلقات کی سرگرمیوں، تعلیمی پروگراموں اور مستقبل کے منصوبوں پر بریفنگ دی۔ ملاقات کے بعد ادارے کی جانب سے ایسوسی ایٹ ڈائریکٹر ڈاکٹر صبا سحر نے صدر شعبہ ڈاکٹر اصغر دشتی کو شیلڈ اور دیگر اساتذہ کو تحائف پیش کئے۔ اس موقع پر شعبہ کے اساتذہ ڈاکٹر عارف خان، ڈاکٹر شہاب الدین اور لیکچرر افشاں بروہی بھی موجود تھیں۔