لاہور(سپورٹس رپورٹر)نیشنل ٹی ٹونٹی کپ کا آغاز ہو گیا، ایونٹ کے پہلے میچ میں سندھ نے سدرن پنجاب کو 42 رنز سے شکست دے دی۔پنڈی کرکٹ سٹیڈیم میں نیشنل ٹی ٹونٹی کپ کے پہلے میچ میں سندھ کی ٹیم سدرن پنجاب کیخلاف پہلے بیٹنگ کرتے ہوئے 19.4 اوورز میں 147 رنز بنا کر آئوٹ ہوئی۔سندھ کی ٹیم کی جانب سے سرفراز احمد 42 رنز بنا کرنمایاں رہے جبکہ صائم ایوب نے 30 اور شرجیل خان نے 24 رنز سکور کیے۔سدرن پنجاب کے محمد الیاس اور ثمین گل نے تین تین وکٹیں حاصل کیں۔ہدف کے تعاقب میں سدرن پنجاب 17ویں اوور میں 105 رنز بنا کر ڈھیر ہوگئی، شرون سراج 36 رنز بنا کر ٹاپ سکورر رہے۔سہیل خان نے 3 جبکہ دانش عزیز اور زاہد محمود نے دو دو کھلاڑیوں کو آئوٹ کیا۔