سیلاب متاثرین کی امداد کیلئے ایمبرائیڈری ایسوسی ایشن کی جانب سے تقریب

حافظ آباد+گوجرانوالہ(نمائندگان خصوصی+نامہ نگار)  صوبہ سندھ، بلوچستان،خیبر پی کے، اورجنوبی پنجاب میں تباہ کاریوں اوران کی بحالی و امداد کیلئے مسلم لیگ(ن) کے ضلعی رہنما شیخ گلزار احمد کی قیادت میں  ایمبرائیڈری ایسوسی ایشن حافظ آباد کی جانب سے جم خانہ سرگودھا روڈ پر ایک فنڈ ریزنگ تقریب کا اہتمام کیا گیا جس میں ایمبرائیڈری ایسوسی ایشن کے عہدیداران ، اراکین اورمالکان نے بھر پور شرکت کی۔ سیلاب زدگان فنڈ ریزنگ تقریب میں نصف گھنٹہ میں 2900 سلے سوٹ سمیت  1 کرڑو روپے سے  زائد رقم اکٹھی کی گئی۔سیلاب زدگان فنڈ ریزنگ تقریب کے روح رواں شیخ گلزاراحمد نے تقریب سے اظہار خیال کرتے ہوئے کہا کہ فنڈ ریزنگ میں اکٹھی ہونے والی رقم کی ایک ایک پائی سیلاب زدگان کی بحالی پر خرچ کرینگے۔ انھوں نے حافظ آباد کی عوام، سوسائٹیز، اور مخیر حضرات سے اپیل کی ہے کہ وہ اس کارخیر میں آگے آئیں اور سیلاب زدگان کی بحالی میں اپنا حصہ ڈالیں۔ سیلاب زدگان کی بحالی و امداد کے لئے فنڈز کلیکشن کے بعدمتاثرہ علاقوں میں جاکر  اپنے اپنے ہاتھوں سے تقسیم کریں گے۔