کراچی(کامرس رپورٹر) چڑیا گھر میں منتقلی کی منتظر ہتھنی مدھوبالا کے لیے خصوصی کنٹینر تیار کر لیا گیا ہے۔تفصیلات کے مطابق عالمی ماہرین کی تنظیم فورپاز کی جانب سے کراچی چڑیا گھر کی ہتھنی مدھو بالا کی سفاری پاک منتقلی کے لیے خصوصی کنٹینر تیار کر کے چڑیا گھر پہنچا دیا گیا۔فور پاز کی ٹیم کنٹینر کے ذریعے منتقلی سے پہلے مدھو بالا کو ٹرینڈ کرے گی، کنٹینر سے مانوس ہونے اور ضروری تربیت کے بعد مدھو بالا کو ستمبر کے آخر تک سفاری پارک منتقل کیا جائے گا۔فورپاز کی جانب سے 30 لاکھ روپے میں خصوصی کنٹینر تیار کیا گیا اور کے ایم سی کو تحفہ دیا گیا ہے، کنٹینر میں بلڈ ٹیسٹ وغیرہ اور ویکسی نیشن کے لیے ہتھنی کو زنجیروں سے باندھنے کی ضرورت نہیں پڑے گی۔