کرکٹ پاکستان کا مقبول کھیل ہے اور قومی کرکٹرز نے بالخصوص 2021میں عالمی کرکٹ میں نمایاں کار نامے سر انجام د ئیے ہیں اور انہی کارناموں کی وجہ سے نہ صرف پی سی بی سرخرو ہوا ہے بلکہ آئی سی سی بھی قومی کرکٹرز بابر اعظم ،محمد رضوان ، شاہین آفریدی ، شاہنواز دھانی و دیگر کا معترف ہے۔آئی سی سی نے سال کے بہترین ون ڈے کھلاڑی کے ایوارڈ کے لیے قومی ٹیم کے کپتان بابر اعظم کو نامزد کیا ہے جو کہ ایک اعزاز ہے۔ بین الاقوامی کرکٹ کے ساتھ ساتھ ڈومیسٹک کر کٹ بھی بھرپور انداز میں کھیلی گئی ہے۔
سال2021 رخصت ہوا چاہتا ہے اور سال نو کے اوائل ہی میں پاکستان سپر لیگ سیزن 7شیڈیول ہے اور 27جنوری 2022سے شاندار کرکٹ میلہ سجنے کو تیار ہے قبل ازیں  29سمبر 2021کو قائد اعظم ٹرافی کے ساتھ ہی ڈومیسٹک سیزن 2021کا اختتام ہوا جس میں کے پی کے نے ناردرن کو 169رنز کے بھاری رنز سے شکست دیکر اپنے اعزاز کا دفاع کیا۔ نیشنل اسٹیڈیم کراچی میں کھیلا گیا ایونٹ کا یہ فائنل مقابلہ گلابی گیند سے کھیلا گیا تھا۔ٹورنامنٹ کی فاتح ٹیم کو ایک کروڑ روپے جبکہ رنرزاپ کو پچاس لاکھ روپے کا انعام دیا گیا۔ناردرن کے مبصر خان کو ٹورنامنٹ کا بہترین کھلاڑی، اوپنر محمد حریرہ کو ایونٹ کا بہترین بیٹر جبکہ روحیل نزیر کو بہترین وکٹ کیپر قرار دیا گیا۔ فائنل میں سنچری اور 2 وکٹیں حاصل کرنے پر خیبر پختونوخواہ کے کپتان افتخار احمد کو پلیئر آف دی فائنل  جبکہ ٹورنامنٹ میں عمدہ کارکردگی پر سدرن پنجاب کے علی عثمان کو بہترین باؤلر کا انعام دیا گیا۔
بلاشبہ 2021بھی گزشتہ دو برس کی مانند کوویڈ19 کی عالمی وباء سے متاثر رہا ہے جس کے باعث دنیا بھر میں دیگر کھیلوں کی طرح کرکٹ کے متعدد سیزن اور ایونٹس التواء کا شکار ہوئے ہیں ۔پورا سال کہیں نہ  کہیں  کورونا وائرس حملہ آور رہا ہے ۔ دسمبر 2021ہی میں ویسٹ انڈیز کا دورہ پاکستان مکمل نہ ہو سکا۔یہ کورونا ہی کی وجہ ہے کہ کہیں خالی انکلوژرز  میں مقابلے منعقد ہوئے اور کہیں محدود تماشائیوں کو اسٹیڈیم آنے کی اجازت  دی گئی۔پاکستان سمیت دنیا بھر ان غیرمعمولی حالات کے باوجود  پی سی بی 2021 میں 267 ڈومیسٹک میچز کا انعقاد کر کے سرخرو رہا ہے۔ کیلنڈر ایئر 2020 میں پی سی بی نے 182 ڈومیسٹک میچز منعقد کیے تھے۔یہ 267 میچز مجموعی طور پر 10 مختلف ٹورنامنٹس میں کھیلے گئے۔ ان ایونٹس میں پاکستان کپ 2021، پی ایس ایل 6، کرکٹ ایسوسی ایشنز ٹی 20، نیشنل ٹی 20، کرکٹ ایسوسی ایشنز چیمپئن شپ، نیشنل انڈر 19 چیمپئن شپ، نیشنل انڈر 19 کپ، کرکٹ ایسوسی ایشنز چیلنج، پاکستان ویمنز کپ اور پریمیئر ڈومیسٹک ٹورنامنٹ اور قائداعظم ٹرافی شامل ہیں۔
2021 کا آغاز پاکستان کپ سے ہوا۔جنوری میں منعقدہ اس ایونٹ میں کْل 33 میچز کھیلے گئے۔تین مختلف وینیوز پر کھیلے گئے ایونٹ کا فائنل خیبرپختونخوا نے سینٹرل پنجاب کو سات وکٹوں سے شکست دے کرجیتا اورٹرافی کا حقدار ٹہرا۔ سینٹرل پنجاب کے طیب طاہر نے اس ٹورنامنٹ میں سب سے زیادہ رنز بنائے۔ انہوں نے 12 میچز میں 60.55 کی اوسط سے 666 رنز بنائے۔خیبرپختونخوا کے آصف آفریدی ٹورنامنٹ کے بہترین باؤلر قرار پائے۔سال کا دوسرا ایونٹ پی ایس ایل 6 کھیلا گیا جس کا فائنل ابوظہبی کے شیخ زید اسٹیڈیم میں منعقد ہوا جہاں ملتان سلطانز نے محمد رضوان کی قیادت میں پشاور زلمی کو 47 رنز سے شکست دے کر ٹائٹل پہلی مرتبہ اپنے نام کیا۔ پاکستان کے کپتان اور کراچی کنگز کے اوپنر  بابر اعظم بیٹنگ چارٹ میں سرفہرست ہیں، انہوں نے 11 میچز میں 69.25 کی اوسط سے 554 رنز بنائے۔ فاسٹ باؤلر شاہنواز دھانی نے ملتان سلطانز کی نمائندگی کرتے ہوئے 11 میچز میں 20 وکٹیں حاصل کیں۔پھر بگٹی اسٹیڈیم کوئٹہ نے 15 سے 22 ستمبر تک 15 میچز پر مشتمل کرکٹ ایسوسی ایشنز ٹی ٹونٹی ٹورنامنٹ کی میزبانی کی۔ ٹورنامنٹ میں اپنے پانچ میں سے چار میچز جیتنے والی سندھ کو فاتح قرار دیا گیا۔  خیبرپختونخوا کے عامر عظمت چار میچز میں 242 رنز بنا کر ٹاپ اسکورر رہے۔ناردرن کے 20 سالہ زمان خان 9 وکٹیں حاصل کرکے ٹاپ پوزیشن پر رہے۔نیشنل ٹی ٹونٹی 23 ستمبر سے 13 اکتوبر تک راولپنڈی اور لاہور میں منعقد ہوا جس میں خیبرپختونخوا نے سینٹرل پنجاب کو 7 وکٹوں سے  ہرا کرٹرافی تھامی۔ کرکٹ ایسوسی ایشنز چیمپئن شپ تین روزہ ایونٹ کا انعقاد 29 ستمبر سے 14 نومبر تک پنجاب کے مختلف مقامات پر ہوا۔ 30 میچز پر مشتمل یہ ٹورنامنٹ سندھ نے جیتا۔بلوچستان کے عظیم گھمن 10 میچز میں 890 رنز بنا کر بیٹنگ چارٹ میں سرفہرست رہے جبکہ  خیبرپختونخوا کے زوہیب خان نے 9 میچز میں 30 وکٹیں حاصل کیں۔15 میچزپر مشتمل کرکٹ ایسوسی ایشنز چیلنج سندھ نے جیتا۔پنجاب کے تین مختلف مقامات پر کھیلے جانے والے اس ٹورنامنٹ میں بھی خیبرپختونخوا کے  عامر عظمت  نے سب سے زیادہ رنز بنائے۔ انہوں نے 5 میچز میں  67 کی اوسط سے 335 رنز بنائے۔ باؤلنگ کے شعبے میں سینٹرل پنجاب کے محمد عرفان جونیئر نے 5 میچز میں سب سے زیادہ 9 وکٹیں حاصل کیں۔پاتھ وے کرکٹ میں12 ٹیموں پر مشتمل نیشنل انڈر 19 چیمپئن شپ (تین روزہ ایونٹ) 10 اکتوبر سے 19 نومبر تک ملک کے مختلف حصوں میں کھیلی گئی۔ چار روزہ فائنل پنڈی کرکٹ اسٹیڈیم میں کھیلا گیا، سدرن پنجاب انڈر 19 وائٹس نے سینٹرل پنجاب انڈر 19 بلیوز کو 2 وکٹوں سے ہرا کر ٹائٹل اپنے نام کیا۔سدرن پنجاب وائٹس کے محمد شہزاد نے چھ میچز میں 92.11 کی اوسط سے 829 رنز  اسکور کیے۔ سینٹرل پنجاب انڈر 19 بلیوز کے ارحم نواب نے6 میچز میں 30 وکٹیں حاصل کیں۔
قومی انڈر 19 کپ 14 اکتوبر سے 14 نومبر تک ملک کے مختلف حصوں میں کھیلا گیا۔ خیبر پختونخوا انڈر 19 بلیوز نے خیبر پختونخوا انڈر 19 وائٹس کو 43 رنز سے شکست دی۔پاکستان ویمنز کپ 9 سے 21 ستمبر تک کراچی میں کھیلا گیا۔ ایونٹ کا ڈے اینڈ نائٹ فائنل پی سی بی چیلنجرز نے جیتا۔ پی سی بی ڈائنامائٹس کی عالیہ ریاض نے سات میچز میں 60.67 کی اوسط سے 364 رنز بنائے۔ پی سی بی بلاسٹرز کی آف اسپنر ندا ڈار بولنگ چارٹ میں سرفہرست ہیں، انہوں نے 7 میچز  میں 14 وکٹیں  حاصل کیں۔
٭٭٭٭