کراچی (اسپورٹس رپورٹر)کراچی میں کھیلا گیا پاکستان اور نیوزی لینڈ کے درمیان پہلا ٹیسٹ ڈرا ہوگیا۔کراچی ٹیسٹ کے آخری روز پاکستان نے اپنی دوسری اننگز ڈکلیئر کردی جس کے بعد نیوزی لینڈ کو باقی 15 اوورز میں138 رنز کا ہدف ملا تھا۔نیوزی لینڈ کے کھلاڑیوں نے تیز کھیل کر ہدف حاصل کرنے کی کوشش کی تاہم 8 ویں اوورز میں ایک وکٹ پر 61 کے مجموعی رنز پر کم روشنی کے باعث کھیل ختم کردیا گیا اور  سیریز کا پہلا ٹیسٹ ڈرا ہوگیا۔نیشنل سٹیڈیم میں کھیلے گئے میچ کے آخری روز پاکستان نے اپنی دوسری نامکمل اننگز کا آغاز 77 رنز دو کھلاڑی آؤٹ سے کیا، امام الحق 45 اور نائٹ واچ میچ نعمان علی 4 رنز کے ساتھ وکٹ پر موجود تھے۔ نعمان علی 4 رنز پر ہی ایل بی ڈبلیو آؤٹ ہو گئے۔ کپتان بابر اعظم 14 رنز کے مہمان ثابت ہوئے اور ایش سوڈھی کی گیند پر ایل بی ڈبلیو آؤٹ ہو گئے۔ کھانے کے وقفے کے بعد سرفراز احمد53 رنز بنا کر ایش سوڈھی کا شکار بن گئے۔سلمان علی آغا بھی 6 رنز بنا کر ایش سوڈھی کی گیند پر بولڈ ہو گئے جبکہ امام الحق 96 رنز بنا کر ایش سوڈھی کی گیند پر چھکا لگانے کی کوشش میںسٹمپڈآؤٹ ہو گئے ۔ محمد وسیم جونیئر بھی 43 رنز  بنا کر سوڈھی ہی کا شکار بنے۔پاکستان نے اننگز ڈکلیئر کی تو سعود شکیل 55 اور میر حمزہ 3 رنز پر ناٹ آؤٹ تھے۔دوسری اننگز میں گرین کیپس نے 8 وکٹوں کے نقصان پر311 رنز بنائے اور اسے کیویز پر مجموعی 137 کی برتری حاصل ہوئی۔پاکستان کی جانب سے اپنی دوسری اننگز ڈکلیئر کرنے کے بعد نیوزی لینڈ کو باقی 15 اوورز میں 138 رنز کا ہدف ملا۔نیوزی لینڈ کی جانب سے براس ویل اور کانوے نے اننگز کا آغاز کیا تاہم ابتدا میں ہی بریس ویل 3 رنز بنا کر آؤٹ ہوگئے۔ کانوے اور لیتھم نے تیز کھیل کر ہدف حاصل کرنے کی کوشش کی تاہم 8 ویں اوورز میں ایک وکٹ پر 61 کے مجموعی رنز پر کم روشنی کے باعث کھیل ختم کردیا گیا اور دو ٹیسٹ میچز کی سیریز کا پہلا ٹیسٹ ڈرا ہوگیا لیتھم 35 اور کانوے 18 رنز بنا سکے۔ ابرار نے ایک کھلاڑی کو آؤٹ کیا۔ایش سوڈھی نے میچ میں 8 وکٹیں حاصل کیں۔ابرا را حمد نے میچ میں 6وکٹیں حاصل کیں۔کین ولیم سن کو میچ کا بہترین کھلاڑی قرار دیا گیا۔یاد رہے کہ کراچی ٹیسٹ کی پہلی اننگز میں پاکستانی ٹیم 438 رنز بنا کر آؤٹ ہوئی تھی جس کے جواب میں نیوزی لینڈ نے اپنی پہلی اننگز 612 رنز 9 کھلاڑی آؤٹ پر ڈکلیئر کر دی تھی۔پاکستان اور نیوزی لینڈ کے درمیان دوسرا اور آخری ٹیسٹ پیر سے کراچی میں ہی شروع ہوگا۔