کراچی(این این آئی)کورنگی میں پانچ دن کی دلہن اچانک حرکت قلب بند ہوجانے سے انتقال کر گئی ۔شادی کا گھر ماتم کدہ بن گیا ،پورے علاقے میں سوگ کا سماںجماعت اسلامی کے ذمہ داران کا نادر لودھی سے اظہار تعزیت ۔تفصیلات کے مطابق جماعت اسلامی کے سابق یوسی ناظم اور لودھی برادری کے صدرنادر علی خان لودھی کی جواں سالہ نواسی کی شادی گزشتہ ہفتہ کے دن ثاقب لودھی سے سرانجام پائی تھی ۔جمعرات کے روز اچانک حرکت قلب بند ہوجانے کے باعث دلہن انتقال کر گئی جس پر دولہا اور دلہن دونوں گھرانوں میں صف ماتم بچھ گیا اور پورا علاقہ سوگ میں ڈوب گیا۔مرحومہ کی نماز جنازہ دارلعلوم کورنگی میں بعد نماز جمعہ ادا کی گئی۔نماز جنازہ میں جماعت اسلامی کورنگی کے سیکرٹری عبدالحفیظ ،قاسم جمال ،شاہد انصاری،محمد کاشف ،عارف رحمان کے علاوہ بڑی تعداد میں اہل محلہ،رشتہ داروں اور برادری کے لوگوں نے شرکت کی ۔بعدازاں مرحومہ کو مقامی قبرستان میں سپرد خاک کر دیا گیا۔امیر ضلع کورنگی نے نادر لودھی کے گھر جا کر ان کی جواں سالہ نواسی کی اچانک وفات پر غم اور دکھ کا اظہار کرتے ہوئے مرحومہ کی مغفرت کی دعا کی اور لواحقین کو اس بڑے غم کو برداشت کرنے اور صبر سے کام لینے کی تلقین کی ۔امیر جماعت اسلامی کراچی حافظ نعیم الرحمان نے بھی نادر علی خان لودھی سے ان کی نواسی کے انتقال پر دکھ کر اظہار کیا اور ان کے اہل خانہ کو صبر کی تلقین کی ہے ۔