پریذیڈنٹ ٹرافی: تیمور خان، محمد سلیمان‘ عبدالفصیح کی سنچریاں

لاہور(سپورٹس رپورٹر)پریذیڈنٹ ٹرافی کرکٹ ٹورنامنٹ کے تیسرے راؤنڈ کے سلسلے میں کھیلے جانے والے میچوں کے تیسرے دن پی ٹی وی کے تیمور خان اور محمد سلیمان کی غنی گلاس کے خلاف جبکہ کے آر ایل کے عبدالفصیح کی ہائر ایجوکیشن کمیشن کیخلاف سنچریاں تھیں۔ عبدالفصیح نے اس میچ کی پہلی اننگز میں بھی سنچری بنائی تھی۔ غنی گلاس کے محمد رمیز نے پی ٹی وی کیخلاف پانچ وکٹیں حاصل کیں۔سٹیٹ بینک کی ٹیم ایس این جی پی ایل کیخلاف اپنی دوسری اننگز میں257 رنز بناکر آؤٹ ہوگئی۔ رمیز عزیز نے 80 اور عرفان خان نے 75 رنزبنائے۔ایس این جی پی ایل کو میچ جیتنے کیلئے 123 رنز کا ہدف ملا ‘تیسرے دن کھیل ختم ہونے پر دو وکٹوں پر 15 رنز بنائے تھے۔ پی ٹی وی کی ٹیم غنی گلاس کیخلاف فالوآن کا شکار ہونے کے بعددوسری اننگز میں 409 رنز بناکر آؤٹ ہوگئی۔تیمور خان نے 160 ‘ محمد سلیمان نے 106 رنزبنائے۔ دونوں نے تیسری وکٹ کی شراکت میں 263 رنز کا اضافہ کیا۔ محمد رمیز نے5 وکٹیں حاصل کیں۔غنی گلاس کو جیتنے کیلئے 219 رنز کا ہدف ملا ‘ تیسرے دن کھیل ختم ہونے پر ایک وکٹ پر 124 رنز بنائے تھے۔ شرجیل خان 74 رنز بناکر ناٹ آؤٹ ہیں۔کے آر ایل نے ہائر ایجوکیشن کیخلاف اپنی دوسری اننگز 401 رنز 9 کھلاڑی آؤٹ پر ڈکلیئر کردی۔ عبدالفصیح نے156 رنز بنائے۔ انہوں نے میچ کی دونوں اننگز میں سنچریوں کا اعزازحاصل کیا۔ پہلی اننگز میں انہوں نے 153 رنز بنائے تھے۔ہائر ایجوکیشن کو کامیابی کیلئے 434 رنز کا ہدف ملا ‘کھیل کے اختتام پر ایک وکٹ پر 117 رنز تھا۔ محمد حریرہ 55 اور سعدخان 44 رنز پر ناٹ آؤٹ ہیں۔