لاہور (سپورٹس رپورٹر) ڈار ہاکی اکیڈمی کے زیراہتمام رابرٹ لتورز میموریل ہاکی سیریزٹیم خورشید اعظم نے جیت لی، فائنل میں پنلٹی شوٹس آؤٹس پر ٹیم خواجہ اسلم کو شکست کا سامنا کرنا پڑا۔  اس موقع پر مہمان خصوصی شرجیل خان، ڈار ہاکی اکیڈمی کے صدر اولمپیئن توقیر ڈار، ریحان بٹ، دانش کلیم، اعجاز احمد، سلطان احمد، اور کھلاڑیوں کی بڑی تعداد موجود تھی۔ فائنل میں خورشید اعظم سولر سرجیزاور خواجہ محمد اسلم کی ٹیموں کے درمیان مقررہ وقت تک 4-4 گول سے برابر رہا۔ اس کے بعد دونوں ٹیموں کے درمیان فائنل میں ٹائٹل کیلئے پنلٹی شوٹس ہوئیں جن میں خورشید اعظم کی ٹیم نے 2 گول سکور کیے جبکہ خواجہ محمد اسلم کی ٹیم کوئی گول نہ سکور کرسکی۔ اس طرح پہلی رابرٹ لتورز میموریل ہاکی سیریز ٹیم خورشید اعظم نے جیت لی۔ تیسری پوزیشن کے میچ میں چودھری غلام رسول ٹائٹنز نے محمد افضل منا تھنڈر سٹرائک کی ٹیم کو 3-1 سے ہرا کر تیسری پوزیشن حاصل کی۔