سا ہیوال ، چیچہ وطنی، فیصل آباد ،کراچی  (نمائندہ نوائے وقت،  نوائے وقت رپورٹ، آن لائن، صباح نیوز) ساہیوال، فیصل آباد اور کراچی میں  مختلف ٹریفک حادثات میں باپ بیٹی سمیت 7افراد جاں بحق اور 7زخمی ہوگئے۔ تفصیلات کے مطابق ساہیوال سے نمائندہ نوائے اور چیچہ وطنی سے نوائے وقت رپورٹ کے مطابق   110۔سیون آر، 119 سیون ڈی آر جنگل روڈ نہر لوئر باری دو آب کے پل116 سیون آر کے قریب ایک ٹرالر نے باپ بیٹی کو کچل دیا جس سے دونوں جاں بحق ہو گئے۔ محمد یار بیٹی رمشا کے ہمراہ موٹر سائیکل پر شہرجا رہے تھے کہ نہر کے پل پر ٹرالر نے کچل دیا۔ ٹرالر ڈرائیور ٹرالر سمیت فرار ہو گیا۔فیصل آباد سے آن لائن  کے مطابق ٹریفک حادثات کے دوران 13سالہ بچے سمیت 3 افراد جاں بحق جبکہ 6 افراد زخمی ہوگئے۔حادثات کے مرتکب ڈرائیورز موقع سے فرار ہوگئے۔پہلا حادثہ ایکسپریس وے پر پیش آیا جہاں پر موٹرسائیکل سوار محمد خرم ڈالے سے ٹکرا کر زندگی کی بازی ہار گیا، اوڑھا چک کے قریب تیز رفتار ٹریکٹر ٹرالی اور لوڈر رکشہ میں تصادم سے  28سالہ محمد علی موقع پر دم توڑگیا۔ تھانہ باہلک کے علاقہ اوکاڑہ روڈ پر تیز رفتار ٹریکٹر ٹرالی اور مسافر وین میں تصادم کے باعث ویگن سوار 13سالہ اللہ یار جاں بحق ہو گیا ۔کراچی سے  صباح نیوز کے مطابق کاٹھور کے قریب 2 ٹریلر آپس میں ٹکرا گئے جس کے نتیجے میں 2 افراد جاں بحق جبکہ 1 شخص زخمی ہوگیا۔پولیس کے مطابق حادثہ تیز رفتاری کے باعث پیش آیا۔