کراچی(این این آئی)ایڈمنسٹریٹر کراچی،مشیر قانون و ترجمان حکومت سندھ بیرسٹر مرتضی وہاب نے کہا ہے کہ کراچی کی ترقی کا سفر جاری ہے نیبر ہڈ اسکیم کے تحت دو ہفتوں میں چوتھے پروجیکٹ کا سنگ بنیاد رکھا گیا ہے، کھارادر اولڈ سٹی ایریا کو ازسرنو تعمیر کریں گے ، ان خیالات کا اظہار انہوں نے اتوار کے روز اللہ رکھا پارک کھارادر میں ری ڈیولپمنٹ آف کھارادر کا سنگ بنیاد رکھنے کی تقریب سے خطاب کرتے ہوئے کیا، اس موقع پر پاکستان پیپلز پارٹی ضلع جنوبی کے صدر خلیل ہوت، جنرل سیکریٹری کرم اللہ وقاصی، نیبر ہڈ اسکیم کے پروجیکٹ ڈائریکٹر نذیر میمن، ڈپٹی کمشنرساتھ ارشاد سودھر، پیپلز پارٹی کے رہنما نعیم میمن، شکیل چوہدری، یوسف ناز اور دیگر بھی موجود تھے، ایڈمنسٹریٹر کراچی بیرسٹر مرتضی وہاب نے کہا کہ یہ ترقی اور حقیقی تبدیلی کا سفر ہے اور یہ جاری رہے گا، ہم بلاتفریق اور بے لوث خدمت پر یقین رکھتے ہیں، عوام ہمارے منصوبوں کو عملی اعتبار سے ہوتا ہوا دیکھ رہے ہیں، انہوں نے کہا کہ حکومتیں اپنے بجٹ کے مطابق کام کرتی ہیں اور کسی بھی ترقیاتی منصوبے کو شروع کرنے کے لئے پروسس کو مکمل کرنا ہوتا ہے، انہوں نے کہا کہ پیپلز اسکوائر جہاں ہر ہفتے ہزاروں لوگ آتے ہیں نیبر ہڈ اسکیم کے تحت مکمل کیا گیا، ابراہیم حیدری کے اندر اوپن اسپیس کو ڈویلپمنٹ کیا گیا، اسی سال ککری گرانڈ اور گذری فٹ بال اسٹیڈیم کی تعمیر بھی مکمل کریں گے، ضلع ملیر میں شیرپا گرانڈ کی زمین کو قبضہ مافیا سے آزاد کروا کر محفوظ کرلیا گیا ہے جہاں کھیلوں کی بہترین سہولتیں مہیا کی جائیں گی، ضلع کورنگی میں 14ہزار روڈ، 8 ہزار روڈ، 12 ہزار روڈ، کورنگی ڈھائی اور پانچ نمبر پر فلائی اوور کی تعمیر بھی سندھ حکومت نے مکمل کی ہے، سمارکنڈیانی ویلیج جانے والی سڑک جو گوٹھوں کی طرف جاتی ہے اس کی تعمیر کا بھی آغاز کر رہے ہیں، کالا بورڈ ملیر کی سڑک کا پی سی ون تیار کیا چکا ہے اور ٹینڈرنگ کا عمل بھی مکمل کرلیا گیا ہے، اسی طرح چاکیواڑہ روڈ اور شیر شاہ روڈ بھی تعمیر کئے جائیں گے، ایڈمنسٹریٹر کراچی نے کہا کہ آج ہم اللہ رکھا پارک میں موجود ہیں یہ پارک 2 ہزار 833 اسکوائر یارڈ پرمشتمل ہے جو تباہ کردیا گیا تھا اس کی ازسرنو تعمیر کی جائے گی، کراچی کے اولڈ سٹی ایریا کی سڑکوں کو بھی ازسرنو تعمیر کریں گے، انہوں نے کہا کہ ککری گرانڈ جہاں محترمہ بے نظیربھٹو شہید کی شادی ہوئی تھی اس کوعالمی سطح کا اسٹیڈیم بنائیں گے جس پر کام جاری ہے، بوٹ بیسن کی فوڈ اسٹریٹ اور اس سے ملحقہ 4پارکوں کی تعمیر کا آغاز بھی کردیا گیا ہے پیپلزپارٹی کے چیئرمین بلاول بھٹو کے وژن کے مطابق کراچی کوترقی دینے کاکام جاری ہے اور اسی طرح جاری رہے گا، تقریب سے خطاب کرتے ہوئے پیپلزپارٹی ضلع جنوبی کے صدر خلیل ہوت نے کہا کہ اگلے کچھ دنوں میں کراچی کو بہتر کرکے دکھائیں گے، پیپلز پارٹی کام کرکے دکھا رہی ہے اور کراچی تبدیل ہو رہا ہے، بڑے بڑے پروجیکٹس پر کاموں کا آغاز کردیا گیا ہے، جنرل سیکریٹری ضلع جنوبی کرم اللہ وقاصی نے کہا کہ بلاول بھٹو کے وژن کے مطابق کراچی کو مسلسل ترقی سے ہمکنار کرنا ہے، وزیر مینشن جو قائد اعظم کی جائے پیدائش ہے، ماضی میں برساتی پانی میں ڈوب جایا کرتا تھا اب ایسا نہیں ہوگا کیونکہ یہاں کے سیوریج اور ڈرینیج سسٹم کو تبدیل کیا گیا ہے اور سڑک کو تعمیر کردیا گیا ہے، ماضی میں ان علاقو ں میں کراچی کے اسٹیک ہولڈرز نے توجہ نہیں دی، ہم تیزی کے ساتھ کراچی کے ترقیاتی منصوبوں کو مکمل کریں گے، پروجیکٹ ڈائریکٹر نیبر ہڈ اسکیم نذیر میمن نے کراچی میں اس اسکیم کے تحت جاری ترقیاتی منصوبوں کے بارے میں آگاہ کیا۔