راولپنڈی (سٹاف رپورٹر) پنجاب آرٹس کونسل میں روحانیت کے عنوان سے قوالی نائٹ کا اہتمام کیاگیا۔ قوالی نائٹ کی مہمان خصوصی ممبر پنجاب اسمبلی سیمابیہ طاہر تھیں جبکہ معروف شاعرہ فرحین چوہدری نے قوالی نائٹ میں نظامت کے فرائض سر انجام دیے۔  قوالی نائٹ میں بھارت سے چھوٹے استاد کا ٹائٹل جیت کر آنے والے روحان عباس خان نے اپنی آواز کا جاود جگایا اور حاضرین محفل سے خوب داد سمیٹی۔ تقریب سے خطاب کرتے ہوئے ممبر پنجاب اسمبلی سیمابیہ طاہر کا کہنا تھاکہ قوالی سن کر انسان تصوف کی الگ دنیا میں پہنچ جاتا ہے، قوالی نے برصغیر پاک و ہند میں اسلام پھیلا نے میں اہم کردار ادا کیا۔ انھوں نے کہا کہ صوفیا کرام نے اسی فن کی بدولت  اسلام کا پرچم برصغیر میں  بلند کیا۔ سیمابیہ طاہر نے بہترین قوالی پیش کرنے پر روحان عبا س خان کو مبارکباد دی۔