لاہور(نیوز رپورٹر) ایگزیکٹوڈائریکٹر لاہور آرٹس کونسل الحمراء نے کہا ہے کہ الحمراء آرٹ میوزیم نئی نسل کے آرٹسٹوں کیلئے عالمی شہرہ آفاق آرٹسٹوں کاکام دیکھنے کا عظیم خزانہ ہے۔ ایک چھت تلے سینکڑوں شاہکار فن پارے دیکھنا کسی خوش قسمتی سے کم نہیں۔ ان خیالات کااظہار انھوں نے نجی کالج کے وفد کے دورہ الحمراء آرٹ میوزیم کی مناسبت سے اپنے تاثرات میں کیا۔ انھوں نے کہا کہ الحمراء آرٹ میوزیم اپنی نوعیت کا واحد منفرد اور نمایاں مقام ہے جہاں آویزاں فن پاروں کو دیکھ کر آج کے نوجوان آرٹسٹ اپنے کام کے مستقبل کا تعین کر سکتے ہیں۔ وفد میں شامل طلبہ و طالبات میں الحمراء آرٹ میوزیم میں آویزاں فن پاروں میں خصوصی دلچسپی لی۔واضح رہے الحمراء آرٹ میوزم ہفتہ کے 7 روز کھلا رہتا ہے۔