ن لیگ قیادت کو مناظرے کا چیلنج‘ ثابت ہو گیا بلاول ابھی بچہ ہے: رانا تنویر

نارنگ منڈی (نمائندہ نوائے وقت) مسلم لیگ ن کے نائب صدر سابق وفاقی وزیر رانا تنویر حسین نے کہا ہے بلاول بھٹو نے نواز شریف اور شہباز شریف کو مناظرے کا چیلنج کر کے ثابت کر دیا وہ سیاسی طور پر ابھی بچہ ہے۔ گیلانی ہاؤس ماڈل سٹی میں ممتاز مذہبی، سماجی اور کاروباری شخصیت پیر سید زاہد شاہ گیلانی کی طرف سے ہزاروں ساتھیوں سمیت مسلم لیگ ن کے امیدوار قومی اسمبلی رانا احمد عتیق انور اور ایم پی اے کے امیدوار چوہدری ارشد ورک کی حمایت کے موجودہ الیکشن مہم کے سب سے بڑے اجتماع سے خطاب کرتے ہوئے کہا وہ پیر سید زاہد شاہ گیلانی کے مشکور ہیں جنہوں نے مسلم لیگ ن کے پورے پینل کی حمایت کا اعلان کیا ہے۔ انہوں نے کہا بلاول بھٹو نے مسلم لیگ ن کی سندھ میں جیت کی منزل آسان کر دی ہے۔ کھنڈرات اور بدحالی کا منظر پیش کرتا سندھ پیپلز پارٹی کی سندھ کی عوام سے دشمنی کی۔ سندھ کے تعلیمی اداروں پر جو بدترین رپورٹ منظر عام پر آئی ہے اس سے ابتر صورتحال ہسپتالوں کی ہے۔ سندھ کی عوام کو تو آج تک پینے کا صاف پانی نہیں مل سکا، بلاول بھٹو ایمانداری سے اپنی الیکشن مہم میں قوم کو بتائیں کیا کراچی اور لاڑکانہ میں بلاول ہائوس میں آج بھی پانی ٹینکرز میں نہیں۔ ایسا آئینہ دکھائیں گے بلاول بھٹو سیاست کی الف ب بھول جائیں گے۔ انہوں نے کہا پیپلز پارٹی کی بلاول بھٹو کو وزیر اعظم بننے کا خواب قوم 8 فروری کو چکنا چور اس وقت ہو گا جب عوام ووٹ کی طاقت سے چوتھی مرتبہ میاں نواز شریف کو وزیراعظم منتخب کریں گے۔