لاہور (سپورٹس رپورٹر) ایشیا کپ ہاکی ٹورنامنٹ کے لئے پاکستان ٹیم کا اعلان 15 اگست کو کیا جائے گا گذشتہ روز ٹورنامنٹ کی تیاری کے لئے پاکستان ٹیم کے ممکنہ کھلاڑیوں کا تربیتی کیمپ ایک روزہ وقفہ کے بعد دوبارہ شروع ہو گیا۔ اس موقع پر فاروڈ کھلاڑی شکیل عباسی نے میڈیا سے گفتگو کرتے ہوئے کہا کہ ٹیم مینجمنٹ کے ساتھ میرا کوئی اختلاف نہیں تھا۔ روزے کے حوالے سے مس انڈر سٹینڈنگ ہو گئی تھی جو اب دور ہو گئی ہے۔ ٹیم کے ہیڈ کوچ اختر رسول میرے والدین کی طرح ہیں میں ان کی عزت کرتا ہوں۔ ان کا کہنا تھا کہ 12 سال سے روزے رکھ رہا ہوں کبھی مسئلہ نہیں ہوا ہے انشااﷲ ایشیا کپ کی تیاری بھرپور انداز میں کی جائے گی۔ میری پوری کوشش ہوگی کہ ٹورنامنٹ میں اچھی کارکردگی کا مظاہرہ کر کے پاکستان ٹیم کو ایشیا کپ کا ٹائٹل جتوا کر 2014ءکے ورلڈ کپ کے لئے کوالیفائی کر سکوں۔ ایک سوال کے جواب میں شکیل عباسی کا کہنا تھا کہ میں اپنی ورلڈ لیگ میں اپنی پرفارمنس سے مطمیئن ہوں تاہم کسی ایک کھلاڑی کی کارکردگی پر انحصار نہیں کیا جا سکتا کامیابی کے لئے تمام کھلاڑیوں کو ملکر اچھی کارکردگی کا مظاہرہ کرنا ہوتا ہے۔