وفاقی ٹیکس محتسب نے اثاثے ظاہر کرنے کے باوجود گوشوارے جمع نہ کروانے والے 12ہزار ٹیکس گزاروں کوہرقسم کی قانونی کارروائی سے استثنیٰ دے دیا

لاہور(کامرس رپورٹر)وفاقی ٹیکس محتسب نے سال 2019ءمیں اثاثہ جات ظاہر کرنے کی ایمنسٹی سکیم کے تحت اثاثے ظاہر کرنے کے باوجود گوشوارے جمع نہ کروانے والے 12ہزار ٹیکس گزاروں کوہرقسم کی قانونی کارروائی سے استثنیٰ دے دیا ہے ۔تین جولائی 2019 کو ایف بی آر کے سسٹم کی خامیوں کی وجہ ایمنسٹی سکیم کے تحت اثاثہ جات ظاہر کرنے والے 12ہزار افراد بروقت گوشوارے جمع نہیں کرواسکے تھے۔وفاقی ٹیکس محتسب نے پاکستان ٹیکس بار اور لاہور ٹیکس بار ایسوسی ایشن کے عہدیداروں کی درخواست پر ایسٹ ڈیکلیئریشن سکیم کے معاملہ پر سوموٹو نوٹس لیا تھا۔وفاقی ٹیکس محتسب مشتاق سکھیرا نے ایسٹ ڈکلیئریشن سکیم کے تحت اربوں روپے کا ٹیکس جمع کرانے والے 12ہزار ٹیکس دہندگان کے حق میں فیصلہ سنا دیا ہے۔فیصلہ کے مطابق12ہزار کیسز کی ریٹرن جمع ہونگی اور ہرقسم کی قانونی کارروائی سے استثنیٰ حاصل ہوگا۔وفاقی ٹیکس محتسب نے ایف بی آر کو اپنے آئی ٹی سسٹم کی استعداد کار بڑھانے کی ہدایت کردی ہے۔وفاقی ٹیکس محتسب کے فیصلہ پرپاکستان ٹیکس بار کے پیٹرن عبدالقادرمیمن، صدرآفتاب ناگرہ،صدر لاہور ٹیکس بار خرم شہباز بٹ،جنرل سیکرٹری پاکستان ٹیکس بار فرحان شہزاد اورسینئر نائب صدر قاری حبیب الرحمٰن زبیری نے وفاقی ٹیکس محتسب کے فیصلہ پر اظہار تشکر کرتے ہوئے کہا ہے کہ اس فیصلہ سے ٹیکس گزاروں کا اعتماد بحال ہوگا.