بابوسر ٹاپ وین حادثہ میں جاں بحق 8 افراد ساہیوال میں سپرد خاک

ساہیوال‘ چیچہ وطنی (نمائندہ نوائے وقت+ نامہ نگار) بابو سر ٹاپ پر 2روز قبل وین حادثہ میں جاں بحق 8افراد ساہیوال کے نواحی گاﺅں میں سپردخاک کر دیئے گئے۔ مرنے والے افراد ایک ہی خاندان کے تھے۔ جبکہ 8افراد زخمی ہیں۔ ساہیوال کا رہائشی خاندان ظفر جوئیہ کے 2بھائی اور ان کے بیوی بچے سیر و تفریح کےلئے شمالی علاقہ میں گئے جہاں بابو سر ٹاپ پر دو روز قبل ہائی روف وین کو حادثہ پیش آگیا اور گاڑی نیچے کھائی میں گرنے کے نتیجہ میں ظفر جوئیہ کے بھائی محمد عرفان، محمد سرفراز، سرفراز کی بیوی نادیہ، بیٹی عائشہ، عرفان کے بیٹے طلحہ عرفان، وقاص عرفان، ثاقب عرفان اور ظفر جوئیہ کا بیٹا سعید ظفر جاں بحق ہوگئے جبکہ ڈرائیور عبدالمالک، زید سرفراز، ردا، عروج فاطمہ، عطیہ، آمنہ، مریم اور زینت بی بی شدید زخمی ہوئے۔ 8افراد کی میتیں ساہیوال لائی گئیں تو گھر میں کہرام مچ گیا اور پورے علاقے کی فضا سوگوار رہی۔ گزشتہ شام مسجد شہداءفرید ٹاﺅن میں نماز جنازہ ادا کی گئی اور آبائی گاﺅں 178/9-L میں انہیں سپرد خاک کردیا گیا۔ جبکہ زخمیوںکو چلاس سے ساہیوال منتقل کرکے نجی ہسپتال میں علاج معالجے کےلئے داخل کرایا گیا ہے۔ ساہیوال کے مختلف حلقوں نے اس افسوسناک حادثے پر انتہائی رنج وغم کا اظہار کرتے ہوئے مرحومین کی مغفرت کےلئے اور زخمیوں کی صحت یابی کےلئے دعا کی ہے۔
سپردخاک