لاہور(سپورٹس رپورٹر)لاس اینجلس اولمپکس 2028 میں کرکٹ کی شمولیت کے امکانات بڑھ گئے ہیں۔ امریکی ذرائع پْراعتماد ہیں کہ اولمپکس میں کرکٹ کو شامل کیا جائیگا اور اس حوالے سے فیصلہ ستمبر میں کیا جائیگا اس معاملے سے متعلق کرکٹ سمیت 9 کھیلوں کی لاس اینجلس اولمپکس میں شمولیت کیلئے لابی کی جا رہی ہے ۔ 1900ء کے اولمپک مقابلوں میں برطانیہ اور فرانس کا ایک کرکٹ میچ کھیلا گیا تھا اور اب 1900ء کے بعد پہلی مرتبہ کرکٹ کو اولمپکس میں شامل کیا جائیگا۔ آئی سی سی نے مرد و خواتین کی پانچ پانچ ٹیموں کیلئے ٹی ٹونٹی فارمیٹ کی تجویز دی ہے۔ کرکٹ کی شمولیت کا مقصد ایشیا میں اولمپکس براڈ کاسٹ رائٹس کو بڑھانا ہے۔ اولمپکس کیلئے 28 کھیلوں کو حتمی شکل دی جا چکی ہے اور مزید کھیلوں کیلئے میزبان ملک کی تجویز آئی او سی منظور کر سکتی ہے۔