حافظ آباد: گیپکو ملازمین کا دور دراز تبادلے کئے جانے کیخلاف احتجاج 

حافظ آباد (نمائندہ نوائے وقت) گیپکو کے ضلع بھر میں تمام سب ڈویژنوں کے ملازمین نے گذشتہ روز دفاتر کی تالہ بندی کر کے دوردراز تبادلے کئے جانے کے خلاف بھرپور احتجاج کرتے ہوئے دھرنے دیئے اوربعدازاں احتجاجی مظاہرے بھی کئے جنکی قیادت گیپکو ریجن گوجرانوالہ کے سیکریٹری جنرل عبدالرزاق مغل و دیگر نے کی۔ اس موقع پر گیپکو ملازمین نے شدید نعرہ بازی کرتے ہوئے کہا کہ ایک طرف گیپکو کو جو کہ نفع بخش ادارہ ہے اسے سوچی سمجھی سکیم کے تحت تباہ کرنے کی کوشش کی جارہی ہے تو دوسری جانب ملازمین کو دوردراز پھینک کر انہیں مزید پریشان کیا جارہاہے ۔انہوںنے کہا کہ اسوقت ملازمین کی کمی کی وجہ سے گیپکو کا ایک ایک ملازم پانچ پانچ بندوںکاکام کررہاہے اگر ملازمین کی دوردراز کئے تبادلے واپس نہ لئے گئے تو وہ غیر معینہ مدت تک ہڑتال کریں گے۔