بنگلہ دیشی شائقین پاکستانی جھنڈا سٹیڈیم میں نہ لاسکے

اسلام آباد (جاوید صدیق) پاکستان اور بنگلہ دیش کے درمیان کرکٹ میچ کے دوران بنگلہ دیشی شائقین کرکٹ کو پاکستان کا جھنڈا لانے کی اجازت نہ دی گئی۔ بھارتی اخبارات میں شائع ہونے والی  رپورٹوں کے مطابق بنگلہ دیش کرکٹ شائقین کو بتایا گیا کوئی پاکستانی قومیت کا حامل ہے تو وہ پاکستان کا جھنڈا لیکر گراؤنڈ میں آسکتا ہے۔ شیر بنگال سٹیڈیم میرپور میں بنگلہ دیشی سیکورٹی اہلکار اس بات پر نظر رکھے ہوئے  تھے کہ بنگلہ دیشی نوجوان پاکستانی جھنڈے  لے کر سٹیڈیم داخل نہ ہوں۔ بھارتی اخبار انڈین ایکسپریس کے مطابق ایک بنگلہ دیشی سیکورٹی اہلکار نے بھارتی میڈیا کو بتایا ہمیں اوپر سے  ہدایات ملی ہیں  کرکٹ شائقین کو اپنے ملک کے علاوہ کسی دوسرے ملک کا جھنڈا  لے کر نہ جانے دیا جائے۔ اسکے علاوہ سٹیڈیم میں بڑے بڑے جھنڈے لانے پر پابندی لگائی گئی تھی۔