برطانیہ: پولیس اہلکاروں پر کھانسنے کے الزام میں گرفتار ملزم پر فرد جرم عائد کر دی

 برطانیہ میں پولیس اہلکاروں پر کھانسنے کے الزام میں گرفتار ملزم پر فرد جرم عائد کر دی گئی۔برطانوی میڈیا کے مطابق واقعہ ہالی فیکس میں پیش آیا جہاں 45 سالہ شخص ڈیوٹی پر مامور پولیس اہلکاروں پر کھانسنے کے بعد فرار ہونے لگا تو اسے گرفتار کر لیا گیا۔ملزم نے کھانسنے کے بعد کہا کہ مجھے کورونا وائرس ہے، ملزم کے خلاف مقدمہ درج کر کے تفتیش شروع کر دی گئی اور آج ملزم پر فرد جرم عائد کر دی گئی۔چند روز قبل اوباش نوجوانوں کے ایک گروہ نے معمر جوڑے کے منہ پرکھانسا اور کورونا وائرس بول کر فرار ہوگئے، عینی شاہدین اور شکایت کنندہ کی مدد سے واقعے کے ایک ملزم کو گرفتار کر کے اسے چارج کیا گیا تھا۔دوسری جانب ملک بھر میں پولیس نے ناکے لگا کر لوگوں کو گھروں سے بلا وجہ باہر نہ نکلنے کی ہدایت کی ہے جب کہ بغیر وجہ گھروں سے نکلنے والے درجنوں افراد کو جرمانے کیے گئے ہیں۔پولیس نے عوام سے لاک ڈاؤن کی صورتحال میں گھروں پر رہنے کی اپیل کرتے ہوئے کہا ہے کہ کورونا کے پھیلاؤ کو روکنےکیلئےلوگ احکامات پرعمل کریں۔