ملتان (سپورٹس ڈیسک) نومی اوساکا، ایناستازیا سیواستووا، ماریہ سکاری، سیرا سوربیس ٹورمو اور بیانکا اینڈریسو نے میامی اوپن ویمنز سنگلز کے کوارٹر فائنل میں جگہ بنا لی۔ میامی اوپن کے سنسنی خیز مقابلوں کا سلسلہ ہارڈ روک سٹیڈیم، فلوریڈا میں جاری ہے، گزشتہ روز ویمنز سنگلز مقابلوں کے پری کوارٹر فائنل مرحلے میں سیکنڈ سیڈ جاپان کی نومی اوساکا نے بیلجیئم کی ایلیس مرٹنز کو سٹریٹ سیٹس میں شکست دی، ان کی جیت کا سکور 3-6 اور 3-6 رہا۔لٹویا کی ایناستازیا سیواستووا نے کروشیا کی اینا کونجوح کو 1-6 اور 5-7 سے شکست دے کر کوارٹر فائنل کیلئے کوالیفائی کیا۔ یونان کی ماریہ سکاری نے امریکا کی جیسیکا پیگولا کو سخت مقابلے کے بعد 4-6 ، 6-2 اور 6-7 سے ہرایا اور کوارٹر فائنل میں جگہ بنائی۔ اسپین کی سیرا سوربیس ٹورمو نے تیونس کی اونس جبیر کو 4-6 ، 6-0 اور 1-6 سے ہرایا۔ ایک اور میچ میں کینیڈا کی بیانکا اینڈریسو نے اسپین کی گربائن مگوروزا کو سخت مقابلے کے بعد 6-3 ، 3-6 اور 2-6 سے ہرا کر کوارٹر فائنل کیلئے کوالیفائی کیا۔