لندن(آئی این پی)انگلینڈ کرکٹ ٹیم کے سابق کپتان  اور آل رانڈر گراہم تھورپ کو افغانستان کرکٹ ٹیم کا ہیڈ کوچ مقرر کردیا گیا ہے۔تفصیلات کے مطابق تھورپ جنہوں نے 1993اور 2005کے درمیان انگلینڈ کے لیے 100ٹیسٹ کھیلے تھے، کو افغانستان کرکٹ بورڈ نے لانس کلوزنر کے کل وقتی متبادل کے طور پر اعلان کیا تھا، جو دو سالہ مدت ملازمت کے بعد نومبر میں مستعفی ہو گئے تھے۔افغان کرکٹ بورڈ  نے ایک پریس ریلیز میں کہا کہ اے سی بی نے ایک نئے ہیڈ کوچ کی خدمات حاصل کرنے کے لیے بھرتی کا عمل شروع کیا تھا، جس کے ذریعے گراہم تھورپ کو اس عہدے کے لیے بہترین دستیاب امیدوار کے طور پر منتخب کیا گیا تھا۔
تھورپ ایک دہائی سے زیادہ عرصے سے انگلینڈ کے سیٹ اپ میں شامل تھے لیکن اسسٹنٹ کوچ کے طور پر ان کا کردار اس سال کے شروع میں متنازعہ حالات میں ختم ہو گیا، جب انہیں ہیڈ کوچ کرس سلور ووڈ اور ڈائریکٹر آف کرکٹ ایشلے جائلز کے ساتھ برطرف کر دیا گیا۔