ملائیشیا کےشہر ایپوہ میں جاری ٹورنامنٹ میں پاکستانی ٹیم کی شکستوں کا سلسلہ رک نہ سکا اور روایتی حریف بھارت کے خلاف بھی ناکامی ہی قومی ٹیم کا مقدربنی۔ بھارت نے میچ کے پہلے ہاف میں ایک گول کرکے برتری حاصل کی جو ہاف ٹائم تک برقرار رہی۔ دوسرے ہاف میں پاکستان کی ٹیم کے کپتان سہیل عباس نے پینلٹی کارنر پر گول کرکے سکور برابر کر دیا لیکن میچ ختم ہونے سے دو منٹ قبل بھارت نے دوسرا گول کرکے میچ دو ایک سے جیت لیا۔ پاکستان فائنل کی دوڑ سے پہلے ہی باہر ہوچکا ہے اور پانچ میچ کھیل کر تین پوائنٹس کیساتھ آخری نمبر پر ہے۔ دیگر میچوں میں نیوزی لینڈ نے ملائیشیا کو چار ایک سے شکست دی جبکہ انگلینڈ اور کوریا کے درمیان مقابلہ ایک ایک گول سے برابر رہا۔