لاہور(نمائندہ سپورٹس +سپورٹس رپورٹر)سابق قومی پلیئر اور چیف سلیکٹر معین خان نے پی سی بی چیئر مین شہریار خان کو کرکٹرز کی انگریزی پر بیان کو تنقید کا نشانہ بنا تے ہوئے کہا ہے کہ اگر کھلاڑیوں کی انگریزی اتنی خراب ہے تو غیر ملکی کوچ کیوں رکھا ۔ چیئرمین پی سی بی شہریار خان کھلاڑیوں کو کم تعلیم یافتہ قرار دینے کے باعث تنقید کی زد میں ہیں ۔ قومی ٹیم کے سابق منیجر اور چیف سلیکٹر معین خان نے بھی میڈیا سے بات کرتے ہوئے شہریار خان کی جانب سے کھلاڑیوں کو کم تعلیم یافتہ قرار دینے کی مخالفت کی ہے ۔ان کا کہنا ہے کہ اگر کرکٹرز کی انگلش اتنی کمزور ہے تو غیرملکی کوچ کیوں رکھا گیا۔ معین خان نے عمر اکمل اور احمد شہزاد کے حق میں بات کرتے ہوئے کہا کہ دونوں میں ٹیلنٹ ہے، پی سی بی کو انہیں بٹھا کر بات کرنی چاہئے۔ معین خان کا یہ بھی کہنا تھا کہ وہ ملکی کرکٹ کی خدمت کیلئے ہر وقت تیار ہیں۔