اداکارہ و گلوکارہ عروہ حسین کی معروف اداکار و سپر ماڈل عمران عباس کے ہمراہ خوبصورت آواز میں گانا گاتے ہوئے ویڈیو وائرل ہو گئی جسے مداحوں کی جانب سے خوب پسند کیا جا رہا ہے۔عروہ حسین کی جانب سے اپنے سوشل میڈیا اکاونٹ انسٹا گرام پر ایک ویڈیو شیئر کی گئی ہے جس میں وہ عمران عباس کے ہمراہ سیڑھیوں پر بیٹھی ایک خوبصورت گانا گنگناتے ہوئے نظر آ رہی ہیں۔اس دوران عمران عباس بھی عروہ حسین کے ساتھ گانا گاتے ہوئے ان لمحا ت سے خوب محظوظ ہوتے نظر آ رہے ہیں۔ویڈیو میں دیکھا جا سکتا ہے کہ عروہ حسین نے کریم رنگ کا عروسی لباس زیب تن کر رکھا ہے جبکہ عمران عباس گود میں شیروانی لیے بیٹھے ہیں۔دونوں کو دیکھ کر اندازہ لگایا جا سکتا ہے کہ یہ دونوں فنکار کسی نئے پروجیکٹ میں ایک ساتھ کام کر رہے ہیں اور یہ ویڈیو اسی پروجیٹ کی شوٹنگ کے دوران بنائی گئی ہے۔عروہ کی جانب سے اپنی ویڈیو کے کیپشن میں لکھا گیا ہے کہ رات گئے شوٹنگ کے دوران ہم خود کا دل بہلا رہے ہیں۔عروہ حسین کی پوسٹ کے کمنٹ باکس میں عمران عباس کی جانب سے کمنٹ کیا گیا ہے جس میں ان کا کہنا ہے کہ وہ اس گانے کو بہت سنجیدگی سے ایک پیشہ ور گلوکار کی طرح گا رہے ہیں، انہوں نے یہ شوٹنگ کا وقت بہت انجوائے کیا ہے۔