اسلام آباد (نمائندہ خصوصی) این ڈی ایم اے کے مطابق جون میں سندھ اور پنجاب کے چند علاقے شدید گرمی کی لپیٹ میں ہوں گے۔ سندھ میں عمرکوٹ، تھرپارکر، ٹنڈواللہ یار، مٹیاری، سانگھڑمیں ہیٹ ویو کا امکان ہے۔ پنجاب میں رحیم یارخان اور بہاولپور کے اضلاع میں ہیٹ ویومتوقع ہے۔ این ڈی ایم اے کا کہنا تھا کہ جمعہ سے5جون تک بالائی علاقوں میں گرد آلود ہوائیں، آندھی، جھکڑ اور ہلکی بارش متوقع ہے۔ اس کے علاوہ چترال، دیر، بٹگرام، ملاکنڈ، صوابی، مردان، مانسہرہ، ایبٹ آباد میں چند مقامات پر ہلکی بارش ہو سکتی ہے۔ پیشگوئی کے مطابق گلگت بلتستان اور آزاد کشمیر میں کل سے5جون تک آندھی اور جھکڑ کے ساتھ ہلکی بارش متوقع ہے۔