لاہور(سپورٹس رپورٹر)پاکستان کی قومی کرکٹ ٹیم کپتان بابر اعظم کی قیادت میں آج لندن سے نیویارک روانہ ہو گی جہاں وہ ٹی 20ورلڈ کپ میں شرکت کریگی۔قومی ٹیم لندن کے ہیتھرو ائیرپورٹ سے پرواز کے ذریعے نیویارک کے جان ایف کینیڈی ائیرپورٹ پہنچے گی ۔پاکستان ٹیم تاریخ میں پہلی بار امریکہ میں کرکٹ میچز کھیلے گی۔عالمی ٹی 20کپ یکم جون سے 29جون تک امریکہ اور ویسٹ انڈیز میں کھیلا جائیگا۔ آج 5 وارم اپ میچ ہونگے۔ ویسٹ انڈیز اور آسٹریلیا پورٹ آف سپین ‘ ڈیلاس میںکینیڈا اور نیدرلینڈ ‘ ٹاروبہ میں پاپوا نیو گنی اور نمیبیا ‘ لاڈر ہل میں آئر لینڈ اور سری لنکا جبکہ افغانستان اور سکاٹ لینڈ پورٹ آف سپین میںمد مقابل ہونگے۔ آخری وارم اپ میچ کل بنگلہ دیش اور بھارت کے درمیان نیویارک میںہوگا۔کل نیویارک میں رات کے وقت ٹی ٹونٹی ورلڈ کپ کی افتتاحی تقریب ہوگی۔ تقریب کا مقصد ٹیموں کو خوش آمدید کہنا ہے ۔ فنکار فن کا مظاہرہ کریں گے ۔