’’ تبدیلی سرکار ‘‘ کا نیاپاکستان مہنگائی کے سمندرمیں ڈوب گیا،سعد یہ عباسی

تلہ گنگ(نامہ نگار) مسلم لیگ ن کی رہنما سابق سینیٹر سعدیہ عباسی نے کہا ہے کہ ’’ تبدیلی سرکار ‘‘ کا نیاپاکستان مہنگائی کے سمندرمیں ڈوب گیا، گرانی کا یہ سلسلہ نہ رکا توعوام سڑکوں پر ہوں گے۔ ان خیالات کااظہار انہوں نے تحصیل تلہ گنگ کے گائوں متھرالہ کی ڈھوک چاندی میں ملک امیر خان کی والدہ مرحومہ کی رسم چہلم میں شرکت کے بعد میڈیا سے گفتگوکرتے ہوئے کیا۔ انہوں نے کہاکہ حکومتی امور اور بحران سے نمٹنے کی صلاحیت سے محروم کھلنڈروں کی ٹیم نے ابتدائی دوماہ میں ہی قوم کو شدید مشکلات سے دوچار کردیاہے ۔ روز بہ روز بڑھتی مہنگائی سے عوام فاقوں پر مجبور ہورہے ہیں ، جب کہ ڈیڑھ کروڑ نوکریاں دینے کے دعوے کرنے والے آج ملک بھر میں یوٹیلٹی اسٹورزکے ملازمین کو نوکریوں سے ہی فارغ کررہے ہیں ،انہوں نے کہاکہ عوام مسلم لیگ ن کے دور کو یادکررہے ہیں، نواز شریف کی محبت عوام کے دلوں سے کوئی نہیں نکال سکتا ، اس موقع پر سردارمنصور حیات ٹمن اور علاقہ کے دیگر عمایدین موجود تھے ۔