جوہانسبرگ (اے پی پی) چیمپئنز لیگ ٹی ٹونٹی کرکٹ ٹورنامنٹ کے مین راﺅنڈ کا آغاز آج سے ہو گا۔ کوالیفائنگ راﺅنڈ سے آکلینڈ ایسز اور یارکشائر نے مین راﺅنڈ تک رسائی حاصل کی جبکہ پاکستانی چیمپئن سیالکوٹ سٹالینز کا مین راﺅنڈ میں جگہ بنانے کا خواب ادھورا رہ گیا۔ 28 اکتوبر تک جاری رہنے والے ایونٹ میں دنیا بھر سے ٹاپ دس ٹیمیں ٹائٹل کے حصول کےلئے آمنے سامنے ہوں گی جنہیں دو گروپس میں تقسیم کیا گیا ہے، گروپ اے میں ٹائٹنز، پرتھ سکارچرز، کولکتہ نائٹ رائیڈرز، دہلی ڈیئرڈیولز اور آکلینڈ جبکہ گروپ بی میں چنائی سپر کنگز، سڈنی سکسرز، لائنز، ممبئی انڈینز اور یارکشائر شامل ہیں۔ افتتاحی روز دو میچ کھیلے جائیں گے۔ پہلے میچ میں ٹائٹنز کی ٹیم پرتھ سکارچرز کے مدمقابل ہو گی، دوسرا میچ کولکتہ نائٹ رائیڈرز اور دہلی ڈیئرڈیولز کی ٹیموں کے درمیان کھیلا جائے گا۔ لیگ کے سیمی فائنلز 25 اور 26 اکتوبر کو کھیلے جائیں گے جبکہ فائنل میچ 28 اکتوبر کو کھیلا جائے گا۔