اسلام آباد(آئی این پی) پاکستان تحریک انصاف کے چیئرمین عمران خان نے کہا ہے کہ نام نہاد دہشت گردی کیخلاف امریکی جنگ نے پاکستان کی جڑوں کو کھوکھلا کر دیا ہے۔حکمران اقتدار بچانے کیلئے ملک کی سلامتی اور خود مختاری کو داﺅ پر لگانے سے بھی گریز نہیں کر رہے‘ ملک میں جتنی غیر ملکی مداخلت آ ج ہے ماضی میں اس کی مثال نہیں ملتی‘ (ن) لیگ اور پیپلز پارٹی کی سوچ اقتدار اور ذاتی مفادات کے تحفظ کے سوا کچھ نہیں آئندہ انتخابات میں تحریک انصاف کا سونامی سب کو عبرتناک شکست دیگا‘ ڈرون حملوں کیخلاف دستخطی مہم اور 26 اکتوبر کو اقوام متحدہ کے دفتر کے سامنے تاریخی احتجاجی مظاہرہ کریں گے‘ میں خدا کے سوا کسی سے خوفزدہ نہیں ہوتا ملک کیلئے جان بھی چلی جائے تو کوئی پرواہ نہیں۔ ایک غیر ملکی اخبار کو انٹرویو میں پاکستان تحریک انصاف کے چیئرمین عمران خان نے کہا کہ میں نے اپنی سیاست کے پہلے دن سے لیکر آج تک ہمیشہ اصولی سیاست کی ہے اور میرے پاس اقتدار میں آنے کیلئے کئی مواقع آئے لیکن میں چور دروازے سے اقتدار مےں آنیوالوں میں سے نہیں ہوں۔