لاہور(سپورٹس رپورٹر) نویں پاکستان پریمیر فٹ بال لیگ 2012ءمیں پشاور، اسلام آباد، فیصل آباد اور لاہور میں کھیلے جانے والے چار میچز کا فیصلہ ہو گیا۔ خان ریسرچ لیبارٹری (کے آر ایل) اور بلوچ ایف سی کے درمیان میچ ریلوے فٹ بال سٹیڈیم لاہور میں کھیلا گیا جو کے آر ایل نے چارصفر سے جیت لیا۔ میچ کی اہم بات سٹرائیکر کلیم اللہ کی ہیٹ ٹرک تھی۔ دوسرا میچ ووہیب ایف سی لاہور اور نیوی کے درمیان یو ایم ٹی فٹ بال گراونڈ جوہر ٹاﺅن لاہور کھیلا گیا جو ایک ایک گول سے برابر رہا۔ تیسرا میچ پاکستان ائر فورس اور کراچی پورٹ ٹرسٹ کے درمیان پی اے ایف کمپلکس گراونڈ پشاورکھیلا گیا یہ میچ بھی بغیر کسی گول کے برابر رہا۔ چوتھا میچ زرعی ترقیاتی بنک لمیٹڈ اور پاکستان انٹرنیشنل ائرلائن کے درمیان جناح فٹ بال سٹیڈیم اسلام آباد میں کھیلا گیا جو زیڈ ٹی بی ایل نے ایک صفر سے جیت لیا۔ میچ کا واحد گول مڈ فیلڈر اظہار الحق نے کیا۔