کیپ ٹاﺅن (آئی اےن پی) چیمپئنز لیگ ٹی 20 میں دہلی ڈیئر ڈیولز نے پرتھ سکارچرز کو دلچسپ مقابلے کے بعد 3 وکٹوں سے شکست دےدی۔ نیو لینڈز کیپ ٹاﺅن میں کھیلے گئے گروپ اے کے میچ میں پرتھ سکارچرز نے پہلے بیٹنگ کرتے ہوئے مقررہ 20 اوورز میں 5 وکٹوں کے نقصان پر 121 رنز بنائے، شان مارش 39 ، سائمن کیٹچ 34 اور مچل مارش 20 رنز کے ساتھ نمایاں رہے، مورنے مورکل نے3 اور اجیت اگارکر نے 2 وکٹیں حاصل کیں۔ جواب میں دہلی ڈیئر ڈیولز نے ہدف 19.3 اوورز میں 7 وکٹوں کے نقصان پر حاصل کر لیا، وریندر سہواگ نے 52 رنز کی عمدہ اننگز کھیلی، ان کے علاوہ دہلی کا کوئی بھی بلے باز خاطر خواہ کارکردگی کا مظاہرہ نہ کرسکا، اجیت اگارکر نے آخر میں 7 گیندوں پر 11 رنز بناکر دہلی کی جیت میں اہم کردار ادا کیا، انہیں شاندار آل راﺅنڈ کارکردگی کا مظاہرہ کرنے پر میچ کے بہترین کھلاڑی کا ایوارڈ دیا گیا۔